Членовите на Советот на МЦМС ја истакнаа клучната улога на МЦМС во граѓанскиот сектор

Советот на Македонскиот центар за меѓународна соработка (МЦМС) на 28 април 2026 година одржа редовна седница, на која беше разгледан и усвоен Годишниот извештај на организацијата за 2025 година, наративен и финансиски, заедно со Извештајот од независниот ревизор.

Со седницата претседаваше Марко Трошановски од Институтот за демократија „Социетас Цивилис“ Скопје (ИДСЦС). Директорот Александар Кржаловски накратко ја претстави работата на Советот на новите членови избрани на минатогодишните избори.

Извештајот го презентираше Кржаловски, кој се осврна на постигнувањата во програмите на кои работи МЦМС и на финансиските податоци. „МЦМС ја заврши годината во која спроведуваше 30 проекти во 6 програми и со буџет од околу 180 милиони денари“, истакна тој.

Членовите беа запознаени и со откажувањето на програмата „Граѓаните против корупцијата”, поддржана од УСАИД. Прекинувањето на договорот доведе до намалување на персоналот од 26 на 21 вработен во 2025 година. Сепак, според Кржаловски, минатата година завршила добро кога се во прашање финансиските податоци, иако откажаната програма беше околу 40 отсто од планираниот буџет.

Во дискусијата што следуваше, членовите на Советот се интересираа за понатамошните активности на МЦМС, вклучително и за програмата „Рехабилитација за отпорност: патот напред” (РРП) и конкретните чекори за интегрирање на лицата опфатени со неа. Членовите го отворија и прашањето за идниот развој на секторот, донаторската перспектива и насоките во кои МЦМС планира да ги поддржи граѓанските организации.

Лулзим Хазири од Асоцијацијата за демократска иницијатива (АДИ) истакна дека „МЦМС е двигател во граѓанското општество”, повторно потсетувајќи на иницијативата за воспоставување платформа на граѓански организации, која според него е клучна за застапување на заедничките интереси пред институциите. Хазири нагласи дека МЦМС треба да се гледа и надвор од програмски зацртани цели, со поголем фокус на зајакнување на целиот сектор.

Присутните констатираа дека МЦМС останува клучен актер во граѓанскиот сектор, со бројни идеи и предлози од членовите за понатамошната работа и улогата на организацијата.

Оваа вест изворно е објавена на веб-страната на Македонски центар за меѓународна соработка