32 години посветена работа за подобро општество

Македонскиот центар за меѓународна соработка (МЦМС) денес одбележува 32 години од основањето.

Основана во периодот на создавање на независната држава, организацијата повеќе од три децении останува посветена на истата мисија: да поттикнува и да води промени што им служат на граѓаните – особено на оние што најмногу имаат потреба од поддршка.

Во изминатите години, МЦМС ја обликуваше својата улога преку промовирање демократија, добро владеење, социјална инклузија и поддршка на граѓанскиот сектор. Денес, со повеќе од 1.710 реализирани проекти и над 77 милиони евра насочени кон граѓаните, организациите и институциите, организацијата стои зад резултати кои трајно го менуваат општеството.

Нашата работа секогаш била заеднички напор. Голем дел од постигнувањата ги создадовме во партнерство со граѓански организации, институции, медиуми и активни граѓани. Тоа е препознатливата одлика на МЦМС – да обединува, да создава капацитети и да гради силно граѓанско општество што може да се справи со постојните и со новите предизвици.

Предизвиците и денес не се помали: борбата против корупцијата, социјалната инклузија и поларизацијата остануваат клучни теми за кои се потребни и експертиза и истрајност. Но, како и досега, ние остануваме тука – подготвени да придонесеме со капацитетите што ги имаме, со знаењето, искуството и посветеноста.

Минатата година, како и низ историјата на МЦМС, ја покажавме нашата способност да се адаптираме и да делуваме таму каде што е најпотребно. Од поддршка на ранливи заедници, преку градење партнерства на национално и регионално ниво, до јакнење на отпорноста на институциите и општеството – продолжуваме да вложуваме во долгорочни решенија.

На 32-от роденден, нашата порака е иста како првиот ден: да создадеме подобро, поправедно и похумано општество.

Им благодариме на сите соработници, партнери и пријатели кои со години ја делат оваа мисија со нас. Заедно продолжуваме вредно да работиме за општество во кое секој граѓанин може да живее достоинствено.

МЦМС останува силна, стабилна и посветена на промените што носат добро за сите.

Оваа вест изворно е објавена на веб-страната на Македонски центар за меѓународна соработка