Женскиот активизам носи промени во руралните средини

Хуманитарно Здружение „Мајка“ од Куманово, на 25 април 2026 година ја одржа третата регионална средба за вмрежување во рамки на проектот „Активни жени“, поддржан од Владата на Швајцарија преку Цивика мобилитас.

На средбата присуствуваа жени активистки од рурални средини од Куманово, Крива Паланка и Кратово, претставници на локални институции, граѓански организации и партнерски организации.  Целта беше  да се презентираат постигнатите резултати, да се споделат искуства од терен и да се отвори дијалог за предизвиците и можностите за понатамошно женско учество во локалното одлучување.

Во рамки на панел-дискусијата „Женски активизам во акција“, учесничките споделија конкретни примери за влијанието на проектот врз нивниот личен развој и развојот на нивните заедници. Една од говорничките истакна дека преку стекнатите знаења и вештини успеала да аплицира и да обезбеди грант за унапредување на сопствениот бизнис, што претставува значаен чекор кон нејзино економско зајакнување и независност. Други учеснички говореа за промените во нивните заедници, нагласувајќи дека процесот не бил лесен, но резултирал со конкретни и видливи промени.

„На почетокот немавме поддршка од заедницата, имаше предрасуди кон жените и неверување дека нешто ќе се оствари, но навистина има поместување“, сподели една од активистките, посочувајќи на постепената промена на ставовите и зголеменото учество на жените во локалните процеси.

Дополнително, беше истакнато дека преку иницијативите на жените во една од заедниците успешно е обезбедено поставување контејнери, како конкретен резултат на застапувачките активности насочени кон подобрување на јавната хигиена и условите за живот.

„Успеавме да иницираме избор на месна заедница и во структурите влеговме две жени“, истакна една од учесничките, што е значајно сведоштво за тоа како организираниот женски активизам придонесува кон поголема застапеност на жените во локалното одлучување и создавање нови можности за влијание.

Регионалната средба ја потврди важноста на женското вмрежување, солидарноста и заедничкото застапување како силни механизми за подобрување на положбата на жените од руралните средини.

Преку проектот „Активни жени“, кој се реализираше во периодот 2024- 2026 година,  над 200 жени од 8 заедници во Куманово, Крива Паланка и Кратово ги зајакнаа своите знаења и вештини за локално учество, застапување и економско јакнење. Како резултат на проектните активности, беа поднесени 58 иницијативи структурирани во 16 формални барања до локалните самоуправи, а значителен број жени добија поддршка за подобро вклучување на пазарот на труд и можности за самовработување.

Проектот „Активни жени“ продолжува да создава простор гласот на жените од руралните средини да биде слушнат, препознаен и активно вклучен во процесите на донесување одлуки.

Регионалната  средба се реализираше во рамки на проектот „Активни жени“, кој го спроведува Хуманитарно здружение „Мајка“ Куманово во партнерство со Регионалниот центар за соработка СПЕКТАР, Регионалниот центар за одржлив развој – Кратово и Фондацијата за развој на мали и средни претпријатија – Куманово, со финансиска поддршка од Владата на Швајцарија преку програмата Цивика мобилитас.

Содржината на оваа објава е единствена одговорност на Хуманитарнотот здружение „Мајка“ Куманово и на ниту еден начин не може да се смета дека ги одразува гледиштата на Владата на Швајцарија, Цивика мобилитас или на организациите што ја спроведуваат