Потпишан Меморандум за соработка помеѓу Извидничкиот одред „Мирко Милески“ – Кичево и Општина Кичево во рамки на проектот за чист воздух

Извидничкиот одред „Мирко Милески“ – Кичево ја информира јавноста дека, во својство на партнер во рамки на проектот „Граѓанска мрежа за чист воздух во Југозападниот регион“, кој го спроведува Здружението на еколози „Натура“ – Струга, со поддршка на Владата на Швајцарија преку програмата Цивика мобилитас, во просториите на Општина Кичево се одржа работна средба, при што беше потпишан Меморандум за соработка помеѓу нашата организација и Општина Кичево.

Меморандумот беше потпишан со градоначалникот на Општина Кичево, д-р Александар Јовановски, што претставува значаен чекор кон зајакнување на институционалната соработка во областа на заштитата на животната средина и подобрувањето на квалитетот на воздухот на територијата на општината.

Проектот има за цел да го зајакне партнерството помеѓу граѓанскиот сектор и локалната самоуправа, како и да овозможи инсталирање на вкупно 30 инструменти за мерење на квалитетот на воздухот во пет општини од Југозападниот регион.

За време на средбата беше презентиран проектот и планираните активности, со посебен фокус на:

• воспоставување структурирана соработка со општинската администрација на Кичево;
• инсталирање и функционализирање на мрежата на граѓански инструменти за мерење на квалитетот на воздухот;
• активно вклучување на Општина Кичево во Регионалниот граѓански совет за воздух, како платформа за редовен дијалог меѓу општините, граѓаните и организациите на граѓанското општество;
• координација на активностите преку назначени контакт лица од страна на локалната самоуправа.

Извидничкиот одред „Мирко Милески“ – Кичево му се заблагодарува на градоначалникот д-р Александар Јовановски и на општинската администрација за покажаната подготвеност и поддршка, потврдувајќи ја својата заложба за отворен дијалог, активно граѓанско учество и конкретни активности во насока на поздрава животна средина и почист воздух за сите граѓани на Кичево.

Проектот „Граѓанска мрежа за чист воздух во Југозападниот регион“ има за цел да го подобри управувањето со квалитетот на воздухот преку активно граѓанско учество, пристап до отворени податоци и соработка со општините во Струга, Охрид, Вевчани, Дебар и Кичево.

Што ќе постигнеме?

• Поставување на најмалку 30 граѓански инструменти (Климерко) за мерење на квалитетот на воздухот, поврзани со јавната платформа www.klimerko.org
• Обука на 100 граѓани, наставници и млади активисти за мониторинг и користење на податоци
• Формирање на Регионален граѓански совет за воздух за редовен дијалог со општините

Клучни активности

• Мапирање и избор на локации
• Инсталација и поврзување на инструментите
• Инфо-кампања за подигање на јавната свест
• Организирање обуки и јавни форуми
• Подготовка на препораки за локални политики за чист воздух
• Регионална завршна конференција

Очекувани резултати

• Функционална регионална мрежа со јавно достапни податоци
• Зајакнати капацитети на граѓаните за активно учество
• Структуриран и континуиран дијалог меѓу граѓаните и општините
• Конкретни препораки за политики за чист воздух во најмалку 5 општини

Проектот создава модел на граѓанска наука и партнерство, каде податоците стануваат алатка за транспарентност, одговорност и одржлива зелена иднина за регионот

Содржината на оваа објава е единствена одговорност на Здружение на еколозите „Натура“ – Струга и на ниту еден начин не може да се смета дека ги одразува гледиштата на Владата на Швајцарија, Цивика мобилитас или организациите што ја спроведуваат.

Civica Mobilitas Embassy of Switzerland in North Macedonia Извиднички одред “Мирко Милески” / Scout group “Mirko Mileski”

#CHinMK #CivicaMobilitas

Оваа вест изворно е објавена на веб-страната на Здружение на еколози „Натура“