Видео кампања: Граѓански активизам за циркуларна економија во управувањето со органски отпад

Дали знаете дека биоотпадот сочинува дури 40–60%, а на некои места и до 70% од комуналниот отпад што го создаваат домаќинствата? Кога овој отпад се меша со останатите фракции и завршува на депонии, се создава метан – експлозивен гас што придонесува за климатските промени и предизвикува пожари.

Токму затоа, решението не е само во законите – туку во нашите навики.

Иако законодавството е напреднато, практичната примена сè уште заостанува. А биоотпадот има огромен потенцијал: од него можат да се добијат корисни производи за секојдневна употреба, да се заштедат природни ресурси, да се заштити биодиверзитетот и да се намали загадувањето.

Циркуларната економија значи да го напуштиме моделот „земи-искористи-фрли“ и да започнеме да го гледаме отпадот како вредност.

Во процесот има улога за сите:

• Домаќинствата – да селектираат и да препознаат дека биоотпадот е ресурс
• Локалните власти – да обезбедат инфраструктура и поддршка
• Училиштата – да создадат навики преку практично учење

Работилниците покажуваат дека децата најлесно учат кога експериментираат. Учениците со ентузијазам создаваат нови производи од биоотпад, а дел од нив дури започнуваат да го практикуваат тоа и дома. Така, знаењето се пренесува и во семејствата, а еколошката свест расте.

Како што веќе видовме со автоматите за рециклирање пластика – луѓето брзо усвојуваат нови навики кога имаат јасна корист и разбирање. Истото може да се случи и со биоотпадот.

Пораката е едноставна:
Селектираниот отпад е ресурс. Неселектираниот станува ѓубре.

Во рамките на проектот „Граѓански активизам за остварување на циркуларна економија во управувањето со органски отпад“, спроведуван од Центарот за ресурси во животна средина (РЕЦ) – Северна Македонија, Еко Логик и Флорозон – Центар за еколошка демократија, со поддршка од Владата на Швајцарија преку Цивика мобилитас., подготвивме серија едукативни видеа со цел да ја приближиме темата за органски отпад до секојдневието на граѓаните.

Содржината на оваа статија е единствена одговорност на партнерите во проектот и на ниту еден начин не може да се смета дека ги одразува гледиштата на Владата на Швајцарија #CHinMK, Цивика мобилитас #CivicaMobilitas, или организациите што ја спроведуваат.

Оваа вест изворно е објавена на веб-страната на Здружение на граѓани за заштита и унапредување на животната средина "ECO - LOGIC"