„Локал актив“ стигна во Куманово – следната станица за медиум на заедницата

Петнаесетина млади, активисти и новинари од Североисточниот Регион беа дел од работилницата што Институтот РЕСИС и Советот за етика во медиумите на Македонија (СЕММ) ја организираа во Куманово.

Настанот беше организиран во рамките на проектот „Медиуми на заедницата за посилно граѓанско општество“, поддржан од Владата на Швајцарија преку „Цивика мобилитас“, а целта е иницијативата „Локал Актив“, како еден редок пример на медиум на заедницата во земјава, да се прошири во нови региони.

Настанот го отвори Слаѓан Пенев од Институтот РЕСИС, кој направи краток вовед за тоа што претставуваат медиумите на заедницата и по што се разликуваат од традиционалните локални медиуми. Пред присутните ги претстави и трите постојни платформи на „Локал Актив“ – „Локал Актив“, „Локал Актив Вардар“ и „Локал Актив Пелагонија“ – како конкретни примери на овој модел.

Работилницата продолжи со дел во кој учесниците споделија свои искуства, теми што се важни за нивната локална заедница, како и навиките за информирање што ги имаат самите или ги забележуваат кај граѓаните во регионот. Иницијативата беше позитивно прифатена од присутните, кои истакнаа дека вакви непрофитни медиуми на заедницата недостасуваат во Североисточниот Регион, но и во државата генерално.

Снежана Трпевска од РЕСИС дискутираше со учесниците за професионалниот и за етичкиот дел од работата на медиумите, додека Билјана Георгиевска од СЕММ ги презентираше успешните примери на медиуми на заедницата од Европа, темите што ги истражуваат и пристапот што го имаат кон заедницата.

Трпевска и Георгиевска ја нагласија важноста на етичкото известување и на саморегулацијата, а низ дискусија со учесниците беа разгледани и конкретни случаи во кои се прекршувале етичките правила, како и позитивни примери каде што редакциите признавале грешки и коригирале одредени содржини.

Во последниот дел од работилницата присутните разработуваа предложени идеи, од кои во следниот период ќе произлезат идни стории на платформите на „Локал Актив“.

Ова беше четврта и последна работилница од овој тип, која РЕСИС и СЕММ ја организираа во новите региони каде што се планира воспоставување медиум на заедницата „Локал Актив“. Во следниот период новинарите, младите и активистите што беа вклучени во процесот, ќе добијат можност да работат на стории со кои ќе бидат истражувани и темелно анализирани важни проблеми на локалната заедница од Североисточниот, Полошкиот, Југозападниот и Југоисточниот Регион на Македонија.

*Содржината на оваа објава е единствена одговорност на Институтот РЕСИС и на Советот за етика во медиумите на Македонија (СЕММ) и на ниту еден начин не може да се смета дека ги одразува гледиштата на Владата на Швајцарија, на „Цивика мобилитас“ или на организациите што ја спроведуваат.