Како да побарам помош?

Не си сама. Побарај поддршка.

Понекогаш најважниот чекор е да кажеш: „Ми треба помош.“

Доколку се соочуваш со семејно или родово базирано насилство, закани, контрола, заплашување, психичко, физичко, сексуално или економско насилство, не мораш сама да се справуваш со ситуацијата.

Станица ПЕТ е тука да те слушне, информира и поддржи.

Обраќањето до нас е можност да разговараш со стручно лице во безбедна, доверлива и неосудувачка средина и да добиеш информации за опциите што ти стојат на располагање.

1. Каква поддршка можеш да добиеш?

Во Станица ПЕТ можеш да добиеш:

Психосоцијална и психолошка поддршка – Разговор и стручна поддршка за справување со страв, стрес, вознемиреност, трауматски искуства, чувство на вина, беспомошност или други последици од насилството.

Психотерапевтска поддршка
Можност за индивидуални средби со психотерапевт и поддршка во процесот на справување со тешките искуства, зајакнување на личните ресурси и повторно градење чувство на сигурност.

Правна поддршка – Информации за твоите права, можностите за заштита и достапните правни постапки, како и насочување кон соодветните институции и услуги.
‍ Поддршка за жени и деца – Поддршка и информации при ситуации во кои се засегнати и децата, со насочување кон соодветните служби согласно потребите на случајот.

2. Не знаеш од каде да почнеш?

Не мораш да имаш подготвена приказна. Не мораш да знаеш која институција треба да ја контактираш. Не мораш веднаш да донесеш одлука.

Можеш само да ни напишеш или да ни кажеш: „Ми треба помош.“

Ќе разговараме со тебе за ситуацијата и ќе те информираме за можностите за понатамошна поддршка.

3. Како можеш да нè контактираш?

Телефон / Viber / WhatsApp: 076/278-753

E-mail: poddrska@stanicapet.org.mk

Во живо: ул. „Прилепски бранители“ бр. 24/1 – мезанин, Прилеп

Можеш да ни се јавиш, да испратиш порака преку Viber или WhatsApp, или да ни пишеш на e-mail.

Твојата безбедност, достоинство и доверба се на прво место.

Ако си во непосредна опасност

Ако во моментот постои непосредна опасност по твојот живот или безбедност, побарај итна помош.

112 – единствен број за итни случаи

Бројот 112 е достапен 24/7 за итни случаи и преку него се координира соодветната итна помош.

Полиција – 192

Доколку ти е потребна полициска интервенција, можеш да ја контактираш полицијата на 192.

Итна медицинска помош

Во итна здравствена состојба можеш да побараш итна медицинска помош; бројот 112 може да се користи за итни случаи.

Центар за социјална работа

Центарот за социјална работа е дел од системот за заштита на жртвите на семејно насилство и соработува со други институции и служби при преземање мерки за заштита.

Не мораш сама да знаеш која институција треба да ја контактираш – можеш прво да се обратиш до Станица ПЕТ и да побараш информации и насочување.