![[Aggregator] Downloaded image for imported item #46149](https://civicamobilitas.mk/wp-content/uploads/2026/03/rabotilnica-prilep-4.jpg)
Едукативна работилница во Прилеп за поддршка на здравјето на мајките и децата
На 13.03.2026 година во Прилеп одржавме едукативна работилница посветена на унапредувањето на здравјето на мајките и децата, со посебен фокус на мајчиното ментално здравје. На работилницата учествуваа 15 жени, од кои дел беа во период на бременост, а дел мајки кои се породиле во изминатата година.
Во рамки на работилницата, учесничките се информираа за значењето на грижата за сопственото здравје за време на бременоста, за здравите животни стилови, за телесните и психолошките промени што се очекувани во овој период, како и за можните ризици и здравствени состојби со кои може да се соочат жените. Посебно внимание беше посветено на периодот по породувањето, при што беа опфатени и вообичаените промени, но и симптомите што укажуваат на потреба од навремена и соодветна здравствена поддршка.
Дел од работилницата беше посветен и на грижата, развојот и раната стимулација на бебињата и малите деца на возраст од 0 до 3 години. Жените добија практични насоки за препознавање на развојните потреби на децата и за создавање безбедна и поддржувачка средина што придонесува за нивен здрав раст и развој.
Во сегментот посветен на мајчиното ментално здравје беа обработени најчестите предизвици со кои се соочуваат жените за време на бременоста и по породувањето по однос на менталното здравје. Учесничките имаа можност активно да се вклучат во дискусија, да споделат искуства и да се запознаат со техники за релаксација и справување со стресот.
Работилницата во Прилеп е дел од серијата едукативни работилници што ЕСЕ ги реализира во рамки на проектот „Соработка во областа на здравството со Северна Македонија“, финансиски поддржан од Амбасадата на Франција во Северна Македонија.
![[Aggregator] Downloaded image for imported item #52397](https://civicamobilitas.mk/wp-content/uploads/2026/10/reg5-1024x576-1-768x432.jpg)
