![[Aggregator] Downloaded image for imported item #43138](https://civicamobilitas.mk/wp-content/uploads/2025/12/rabotilnica-ku-4.jpg)
Едукативна работилница посветена на унапредување на здравјето на мајките и децата
На 18.12.2025 година во Куманово ја одржавме третата едукативната работилница посветена на унапредување на здравјето на мајките и децата, со посебен фокус на мајчиното ментално здравје. На работилницата учествуваа 14 жени, од кои дел беа во период на бременост, а дел мајки кои се породиле во изминатата година.
Во рамки на едукацијата, учесничките се информираа за значењето на грижата за сопственото здравје за време на бременоста, телесните и психолошките промени кои се очекувани во овој период, како и за можните ризици и здравствени состојби со кои може да се соочат жените. Посебно внимание беше посветено на периодот по породувањето, при што беа опфатени и нормалните појави, но и симптомите кои укажуваат на потреба од навремена и соодветна здравствена поддршка.
Дел од работилницата беше посветен на грижата, развојот и раната стимулација на бебињата и малите деца од 0 до 3 години. Жените добија практични насоки за препознавање на развојните потреби на децата и за создавање безбедна и поддржувачка средина која придонесува за нивен здрав раст и развој.
Во сегментот посветен на мајчиното ментално здравје, беа обработени најчестите предизвици со кои се соочуваат жените за време на бременоста и по породувањето. Учесничките имаа можност активно да се вклучат во дискусија, како и да практикуваат техники за релаксација и справување со стресот.
Работилницата во Куманово е дел од серијата од вкупно десет планирани едукативни работилници кои се реализираат од страна на ЕСЕ во рамки на проектот „Соработка во областа на здравството со Северна Македонија“, финансиски поддржан од Амбасадата на Франција во Северна Македонија.
![[Aggregator] Downloaded image for imported item #52397](https://civicamobilitas.mk/wp-content/uploads/2026/10/reg5-1024x576-1-768x432.jpg)
