До 30 јуни може да се искористи преостанатиот годишен одмор од 2025 година

Работниците кои имаат неискористени денови од годишниот одмор од 2025 година треба навреме да поднесат барање до работодавачот за користење на преостанатиот одмор.

Според Законот за работните односи, годишниот одмор по правило се користи во текот на календарската година. Доколку одморот се користи во два дела, првиот дел треба да трае најмалку 12 работни дена, а остатокот може да се искористи најдоцна до 30 јуни следната календарска година.

Тоа значи дека преостанатите денови од годишниот одмор од 2025 година може да се користат заклучно со 30 јуни 2026 година.

Годишниот одмор е право на работникот и работодавачот е должен да овозможи негово користење согласно закон, потребите на работниот процес и можностите за одмор и рекреација на работникот.

Во деновите на годишен одмор не се пресметуваат празници, саботи и недели, денови на боледување и други оправдани отсуства од работа.

За таа цел, подготвивме образец – Барање за користење годишен одмор, кој работниците можат да го достават до работодавачот во фирмата каде што работат.

Важно е барањето да се достави писмено и навреме, за работникот да има доказ дека побарал користење на годишниот одмор.

Доколку работодавачот не овозможува користење на годишниот одмор или го ограничува ова право спротивно на закон, работниците можат да побараат заштита на своите права и да се обратат до надлежните институции или до Гласен Текстилец.

Годишниот одмор не е привилегија — тој е законско право на секој работник.