Вести од граѓанските организации

На 17 јули 2025 година, шест млади Македонци од дијаспората го завршија престојот во Македонија и учеството во тринеделната програма „Родум од Македонија“ (Birthright Macedonia) 2025. Организирана од Обединетата македонска дијаспора (ОМД) и Македонскиот центар за меѓународна соработка (МЦМС), оваа програма секоја година им овозможува на младите чии корени се во Македонија да се поврзат со татковината преку стручни пракси, преку средби со различни општествени чинители, запознавајќи ја културата на земјата. На завршната свеченост која се одржа во Вајн Бери (Wine Berry) во Скопје, учесниците се осврнаа на своите искуства од деветтото издание на „Родум од Македонија“.

„Моето време поминато во Македонија преку програмата е искуство што ќе го носам со себе засекогаш“, вели Лила Илиева Ноневски од САД. „Стекнав пријатели за цел живот и бев дел од извонредни авантури. Имав можност повторно да се поврзам со моето потекло, семејството и културата. Ќе ги паметам доцните разговори  со шопска салата и пеењето во автомобил додека патувавме меѓу историските локалитети,“ рече таа.
Викендите беа посветени на запознавање на културно наследство. На почетокот учесниците уживаа во запознавањето со Скопје. Тие го посетија кањонот Матка, црквата „Св. Пантелејмон“, Водно, Старата скопска чаршија и центарот на градот. Вториот викенд беа во Охрид, каде ги разгледаа културните знаменитости како што се црквата „Св. Софија“, Античкиот театар, „Св. Јован Канео“ и манастирот „Св. Наум“, пред да се разладат во прекрасното Охридско Езеро во с. Трпејца. Следниот ден заминаа за Битола, каде ја посетија познатата Саат-кула, црквата „Св. Димитрија“, прошетаа по Широк сокак и го разгледаа Музејот на Битола. Последниот викенд го минаа на традиционалната Галичка свадба.

Во текот на работната недела, учесниците имаа „Среда надвор од канцеларија“, или пауза од нивните пракси за да се вклучат во други активности.  Тие беа гости на Претседателката Гордана Силјановска-Давкова, во Собранието на Р.С. Македонија се сретнаа со пратеничката Марија Петрушевска, а го посетија и Министерството за надворешни работи, каде се сретнаа со Боро Мирчевски и Горан Ангелов од Агенцијата за иселеништво. Разговараа за зајакнување и подобрување на односите меѓу Македонија и дијаспората. Учесниците ги посетија и Музејот на македонската борба за самостојност, Меморијалниот центар на холокаустот, Археолошкиот музеј на Македонија, Музејот на македонските бегалци, како и гробот на Гоце Делчев. Оваа година, за првпат беа вклучени во општествено одговорни активности како што беше акцијата за чистење на отпадоци во Градскиот парк во Скопје.

„Оваа програма се стреми да ги прикаже значајните историски настани од Македонија, но и да понуди внатрешен поглед во политичкиот систем,“ смета Кирил Гаџовски oд Канада. Тој додаде дека најмногу ќе го памети капењето во Трпејца за време на посетата на Охрид.
На завршниот настан учествуваа претставници од компаниите каде учесниците ја извршуваа својата практична работа, Македонци од дијаспората, локални Македонци, тимот одговорен за програмата и други поддржувачи. Заедно го прославија успехот на учесниците од „Birthright Macedonia 2025“ и нивната продлабочена поврзаност со македонските корени.

Ова е деветтиот по ред „Родум од Македонија“. Досега, преку програмата, повеќе од 60 млади луѓе од САД, Канада, Австралија, Велика Британија, Швајцарија, Босна и Херцеговина и Нов Зеланд имаа можност директно да се поврзат со своите корени и татковина. Секоја година, ОМД и МЦМС ги пречекуваат студенти од втора, трета, па дури и четврта генерација Македонци родени во дијаспората. За некои ова е прва посета на Македонија, а за други, прво доживување на земјата на нов, подлабок начин.

Следно >

Поврзани:

Finance Think учествуваше на Форумот на високо ниво посветен на проширувањето на ЕУ, со учество на Извршната директорка Благица Петрески, како член на Европскиот економски и социјален комитет (EESC) за земјите-кандидати за проширување.

Форумот, под мотото „Building an Inclusive Future in an Enlarged EU“, се фокусира на улогата на социјалниот дијалог, граѓанското општество и вклученоста на младите во процесот на проширување.

ПОВИК ЗА АНГАЖМАН НА НАДВОРЕШЕН ЕКСПЕРТ/КА за изработка на Policy Paper (Документ за политики) за поддршка на имплементацијата на Националната програма за превенција на употреба на дроги во средните училишта. За потребите на проектот „Воспоставување на национален систем за превенција на употреба на дрога во училиштата“, поддржан од Европскиот инструмент за демократија и човекови права […]
The post Повик за надворешен експерт appeared first on ХОПС.

Платформата за родова еднаквост остро реагира на предлог-измените на Законот за полиција, кои се веќе доставени до Собранието на   Република Северна Македонија, а со кои се предлага бришење на членот 96 од важечкиот закон  член што јасно ја утврдува обврската за   почитување на принципот на еднаквост  при вработувањето во полицијата.
Член 96 од постојниот Закон за полиција:(1) При вработувањето во Полицијата треба да бидат соодветно и правично застапени граѓаните кои припаѓаат на сите заедници, со почитување на критериумите на стручност и компетентност.(2) При вработувањето во Полицијата да се почитува принципот на еднаквост на половите.
Со ваквата измена се укинува единствениот член кој експлицитно упатува на еднаквост и инклузивност во полициската структура,  што не само што е спротивно на националното законодавство и на обврските преземени со Истанбулската Конвенција и други меѓународни конвенции, туку испраќа и опасна порака дека родовата еднаквост и инклузивноста се ирелевантни во изградбата на безбедносните институции.
Овој предлог доаѓа во контекст на сериозна јавна загриженост поради бројни случаи на несоодветно постапување и неефикасна заштита од страна на полицијата, особено во случаи на родово базирано и семејно насилство. Наместо унапредување на стандардите и одговорноста, се предлага институционално назадување.
Укинувањето на вакви клучни одредби значи легитимирање на нееднаквоста и дискриминацијата, но и сериозно го загрозува кредибилитетот на полицијата како сервис за сите граѓани. Жените кои и онака се недоволно застапени во безбедносниот систем,  ќе станат уште поневидливи во институција што има клучна улога во заштитата од насилство и гарантирањето на јавната безбедност.
Бараме итно повлекување на измената со која се укинува членот 96 и јасна заложба од институциите дека правото на еднаквост и родова застапеност останува неповредливо загарантирано и задолжително во секој дел од системот, особено во полицијата.

Македонскиот центар за меѓународна соработка (МЦМС) во соработка со Националниот комитет за спречување насилен екстремизам и борба против терориза (НКСНЕБТ) на 16 јули 2025 година ја организираа работилницата „Радикализација – препознавање и методологија на работа“. На настанот учествуваа дел од членовите на Националниот комитет како и претставници на клучните безбедносни институции: Министерството за внатрешни работи – Биро за јавна безбедност, Агенцијата за национална безбедност, Агенција за разузнавање и Министерството за одбрана.

Во своите воведни обраќања, националниот координатор  Павле Трајанов и директорот на МЦМС, Александар Кржаловски се осврнаа на соработката меѓу граѓанскиот сектор и институциите во областа на спречување на насилен екстремизам и радикализација, посочувајќи дека со текот на времето е воспоставена координација и комуникација што овозможува граѓанскиот сектор да има конструктивна улога во поддршката на чувствителни безбедносни процеси. Трајанов, го нагласи значењето на координираното дејствување и меѓусекторската поврзаност, подвлекувајќи дека безбедноста не е исклучиво надлежност на државните органи, туку е и поширока општествена одговорност во која граѓанското општество и меѓународните партнери имаат суштинска улога.

Содржината на работилницата беше структурирана низ интерактивни излагања и дискусии предводени од проф. д-р Тања Милошевска, од Филозофскиот факултет, Институт за безбедност, одбрана и мир при Универзитетот „Св. Кирил и Методиј“, Скопје, и полковникот Методи Хаџи-Јанев, вонреден професор и д-р по меѓународно право на Воената академија „Генерал Михаило Апостолски” која е дел од Универзитетот „Гоце Делчев“ во Штип. Во своето излагање, Милошевска се фокусираше на теоретската рамка на радикализмот, објаснувајќи ги разликите меѓу радикализам, насилен екстремизам и тероризам – три поими кои често се користат како замена еден на друг, но опишуваат суштински различни феномени. Беа обработени и различните форми на радикализација – од религиозен, етнички и политички радикализам, до се понагласената онлајн радикализација преку дигитални канали и социјални мрежи. Дискусиите го опфатија и процесот на радикализирање, фазите низ кои тој се развива, како и индикаторите за рано препознавање.
Во вториот дел од работилницата, професорот Методи Хаџи-Јанев се осврна на практичните аспекти на интервенција, со акцент на улогата на полицијата и другите институции во спречување на радикализацијата. Неговото излагање ја нагласи важноста на довербата помеѓу институциите и заедницата, потребата од пристапи за де-ескалација и меѓуинституционална соработка. Преку практични примери и сценарија, се разработуваа пристапи во справување со лица кои покажуваат знаци на радикализација, како и улогата на различни институции – од образовните, социјалните и верските институции до безбедносните служби – во мултисекторска соработка.

Учесниците истакнаа дека содржината била интересна за сите и дека со вакви работилници треба да бидат опфатени повеќе припадници на безбедносните служби, особено на Министерството за внатрешни работи. Дел од нив изразија интерес и за други аспекти во справувањето со овие предизвици поврзани со финансирањето, хибридните закани, како и за подлабински погледи на потеклото на радикализацијата. Вакви интензивни и стратешки насочени работилници придонесуваат за  зајакнување на капацитетите на безбедносните институции за рано препознавање и координиран одговор  на ризиците поврзани со радикализацијата и насилниот екстремизам, отворајќи простор за подлабоко институционално вмрежување и соработка со граѓанското општество во интерес на мирот и стабилноста во земјата.

Следно >

Поврзани:

Во месец јануари останавме затекнати од бришење на основите за дискриминација од Законотза основното образование. Нашите информирања дека се постапува спротивно на ратификувани меѓународни акти и постоечки закони, останаа неслушнати.
Во месец февруари, заедно со Платформата за родова еднаквост остро реагиравме на предложените измени во Законот за полиција, со кои стана речиси невозможно да се одземе службено оружје од полициски службеник кој се сомничи за сторено семејно насилство.
Позитивно сме изненадени од брзата реакција на Министерството за внатрешни работи и итнотоповлекување на ваквиот предлог.
Април беше особено тежок месец во кој ја штитевме недискриминацијата од Собранието:Се соочивме со сериозно непочитување и повреда на Законот за спречување и заштита од дискриминација преку назначување на лице кое не само што не ги исполнува условите, туку него разбира ниту значењето на концептот на недискриминација, за член на Комисијата за спречување и заштита од дискриминација.
Законот за средно образование наместо да добие одредби со кои се штитат учениците,родителите и вработените од дејствија на дискриминација кои може да доведат до исклучување, булинг и сериозни психички нарушувања, доби уште поголемо уназадување преку бришење на повикувањето на Законот за спречување и заштита од дискриминација како заштитен механизам.
Истото се случи и со Законот за учебниците во основното и средното образование.
Владата го именуваше Петар Богојевски прославен по своите изјави со вознемирувачки говор,навреди и говор на омраза, како директор на Националната агенција за европски образовнипрограми и мобилност (Еразмус +).
Среќни сме што можеме да забележиме дека, по реакции од Мрежата во јавноста и до меѓународната заедница, во месец јуни 2025 година, г-н Богојески изјави дека заминува од Агенцијата.
Во месец јули реагиравме на предлог- законот за верски училишта, кој го сметаме за противуставен, правно неусогласен и опасен обид за поткопување на секуларниот карактер надржавата и за институционализација на верското образование во системот на формално образование.
Истиот месец, соочени со изјавата на Премиерот дека размислуваат за воведување на данок за немажени и неженети, бевме принудени да ја повикаме Владата, како орган којшто е овластен предлагач на закони и политики, да се воздржи од иницијативи кои поттикнуваат дискриминација,  а институциите да застанат во одбрана на правата на сите граѓани, без разлика на нивниот брачен статус.
Како резултат на реакциите, Премиерот беше приморан да се извини за промовирање на идеи коишто поттикнуваат дискриминација.

Ве информираме дека работното време за комуникација и прием на странки во канцеларијата на Гласен текстилец е од 11:00 до 17:00 часот, секој работен ден од понеделник до петок.

Покрај тоа, постојано можете да ги користите нашите онлајн услуги.

​Напомена: Променет е телефонскиот број на 075 316 107.

Ве благодариме на соработката!

Гласен текстилец

www.glasentekstilec.mk

  Асоцијација за здравствена едукација и истражување- ХЕРА, ги информира граѓаните од Општина Центар и основните учлиштата дека услугите поврзани со психосоцијална поддршка, превенција од […]

Хелсиншкиот комитет за човекови права – Скопје објавува повик за млади кои сакаат да се стекнат со знаења, вештини и искуство поврзано со човековите права и евроинтегративниот процес. Доколку веруваш дека младите треба да имаат глас и улога во создавањето на подобро, поправедно општество – оваа академија е наменета токму за тебе. 

Што претставува ЕУ Академијата? 
Академијата е неформална, тридневна обука која им овозможува на младите учесници критички да размислуваат за човековите права, антидискриминацијата, говорот на омраза, злосторствата од омраза и булингот, како и за улогата на Европската Унија во овие процеси. Преку практична симулациска вежба, учесниците ќе имаат можност да се најдат во улога на различни чинители – институции на ЕУ, државни институции, граѓански организации и медиуми – и да преговараат за пристапувањето на земјата во ЕУ низ призмата на човековите права и владеењето на правото. 

Обуката ги комбинира предавањата од експерти, симулациските вежби и структурирани дискусии, со цел учесниците да развијат вештини за застапување, соработка, дипломатија и решавање конфликти. 

Детали за програмата 

Датуми: 11 – 14 август 2025 

Локација: Хотел Метропол, Охрид 

Сместување: двокреветни соби 

Работен јазик: македонски 

сите сесии се задолжителни 

 
Кој може да аплицира? 
Ги охрабруваме да се пријават млади лица на возраст од 18 до 26 години од цела Северна Македонија кои: 

имаат интерес за човекови права и европска интеграција, 

сакаат да развијат аналитички и лидерски вештини, 

се подготвени да се вклучат во тимска работа, дебати и симулациски вежби, 

се отворени за нови искуства и соработка со други млади активисти. 

 
Што е покриено? 
Хелсиншкиот комитет целосно ги покрива трошоците за пат, сместување, оброци и работни материјали. Превозот до и од Охрид е организиран од страна на организаторот. Учеството е целосно бесплатно. 
 
Како да се пријавиш? 
Пополнете го формуларот за апликација најдоцна до 3 август 2025 година на следниот линк.Избраните учесници ќе бидат контактирани на 4 август 2025 година. 
 
Имаш прашања? 
Пиши ни на helkom@mhc.org.mk 
 
ЕУ Академијата за човекови права се организира во рамки на проектот „Фундаменталните човекови права на прво место – активен придонес за владеење на правото“, финансиран од Европската Унија, а имплементиран од Хелсиншкиот комитет за човекови права – Скопје.