Вебинар: Реформската агенда и влијанието врз бизнис заедницата

Што значи Реформската агенда за македонските компании? Како најавените реформи ќе влијаат врз пристапот до финансии, регулаторните процедури, дигитализацијата и зелената транзиција?  

Токму на овие прашања со посебен фокус на развојот на приватниот сектор и подобрувањето на деловното окружување, беше посветен информативниот вебинар организиран од Институтот за демократија „Социетас Цивилис“ – Скопје, во рамките на проектот „Зајакнување на учеството на граѓаните и бизнисите во Берлинскиот процес и Реформската агенда на Северна Македонија“, поддржан од Фондација Отворено општество – Западен Балкан. 

Настанот, реализиран во соработка со Бизнис конфедерацијата на Северна Македонија, отвори простор за практична дискусија за тоа како реформските процеси се преточуваат во конкретни услови за работа на бизнис заедницата и како приватниот сектор може поактивно да се вклучи во нивното следење и спроведување.

Вебинарот опфати презентација и практична дискусија за клучните реформски мерки што се однесуваат на малите и средни претпријатија, вклучително подобрување на регулаторната рамка, пристапот до финансии, дигиталната трансформација, намалувањето на неформалната економија и зелената транзиција. Дополнително, беа обработени и пошироките реформи што имаат значајно влијание врз деловното окружување – развојот на човечкиот капитал, дигитализацијата на јавните услуги и институционалните промени насочени кон создавање постабилна и попредвидлива деловна средина.

На вебинарот учествуваа претставници на компании, мали и средни претпријатија, стопански организации, институции, како и експерти и практичари од областа на економскиот развој и јавните политики. Целта беше да се зголеми информираноста и разбирањето на реформските процеси, но и да се поттикне поактивна улога на бизнис заедницата во нивното следење и имплементација.

Настанот е дел од пошироките активности на проектот, чија главна цел е подобрување на комуникацијата и зголемување на свесноста за опипливите придобивки од реформите што треба да придонесат кон унапредување на квалитетот на живот и деловното опкружување во нашата држава, со фокус на зајакнување на економската интеграција со Единствениот пазар на ЕУ и поттикнување на регионалната економска интеграција преку Заедничкиот регионален пазар.