Прв состанок на Мрежата на специјализирани адвокати и НВО кои помагаат на жени жртви на насилство

На 22 ноември 2024 година, Христина Здравеска – правник од нашето Здружение присуствуваше на првиот состанок на Мрежата на специјализирани адвокати и НВО кои работат со жени жртви на насилство кој се одржа во седиштето на Советот на Европа во Стразбур, Франција.

Одделот за насилство врз жените на Советот на Европа го собра почетниот сет на членови на оваа нова мрежа со цел споделување знаење и вмрежување. Со присуство на адвокати и невладини организации кои им помагаат на жртвите од 38 земји-членки на Советот на Европа, состанокот го означи почетокот на зајакнатата соработка и споделувањето на правните стратегии за случаите на насилство врз жените меѓу адвокатите во Европа. Сесиите опфатија клучни теми, вклучително и растечката јуриспруденција на Европскиот суд за човекови права за случаите на семејно насилство и силување, стратешката улога на Истанбулската конвенција во судските спорови и студии на случај кои илустрираат ефективни правни пристапи.

Целта на Мрежата е да ја олесни редовната размена меѓу адвокатите од сите земји-членки на Советот на Европа и да послужи како платформа за споделување знаење за стратешки судски спорови за насилството врз жените. Преку иновативна судска практика на национално и на европско ниво ќе се подобри имплементацијата на Конвенцијата на Советот на Европа за спречување и борба против насилството врз жените и семејното насилство (Истанбулска Конвенција) и Европската конвенција за човекови права.

Повеќе информации за мрежата и нејзините активности ќе најдете на следниот линк

This post was originally published on this site