И ПОСЛЕ Сѐ, ПРОБЛЕМИ СО РОДОТ – Критички истражувања за родот, полот и сексуалноста

Го објавуваме и дигитално изданието И ПОСЛЕ Сѐ, ПРОБЛЕМИ СО РОДОТ – Критички истражувања за родот, полот и сексуалноста,зборник што произлезе од потребата да се создаде простор за колективно критичко мислење во услови на растечка антиродова реторика и засилен неоконзервативен притисок. Наместо да се прифати окупацијата на јавниот дискурс, ова издание ги враќа поимите во нивната аналитичка и еманципаторска димензија и нуди алатка корисна за студенти, наставници, академски работници и пошироката јавност.

Структурата на зборникот се движи низ широк опсег дисциплини, од историја, филозофија и политичка економија, до биологија, неврологија, антропологија, социологија, теории на телесноста, југословенски социјализам и современи квир студии, со цел да се поврзат знаења што ги расклопуваат антиродовите митови и ги демистифицираат идеолошките операции на антиродовите движења.

Изданието ги спојува темелните теории на Џоан Валах Скот, Џудит Батлер, Гејл Рубин, Барбара Џ. Рисман и Џорџијан Дејвис со регионалните историографии на Ивана Хаџиевска, Ивана Пантелиќ и Адријана Захаријевиќ; истражувањето на Франко Дота за раниот хомофилен активизам; постколонијалните анализа на Марија Лугонес, Серена Нанда и Џени Андрин Мадсен Еванг; марксистичките согледувања на Холи Луис и Ненси Фрејзер; како и современите научни ревизии на биолошкиот бинаризам кај Џоан Рафгарден, Мајра Џ. Херд, Закари Дубоа, Хетер Шатак-Хајдорн, Хајд, Биглер, Џоел, Тејт, Ван Андерс и Агустин Фуентес.

Публикацијата е достапна за преземање на: https://coalition.org.mk/wp-content/uploads/2025/11/I-POSLE-SE-PROBLEMI-SO-RODOT_DIGITAL.pdf 

Доколку сакате физичка копија од изданието во следниот период ќе носиме бесплатни примероци на нашите настани, каде што секој ќе може да земе примерок.

Одговорни уредници/чки на публикацијата се: Славчо Димитров, Мања Величковска и Сара Миленковска. 

Главна одговорна за преводот од англиски јазик беше Грација Атанасовска, чија работа ја носи речиси целата тежина на оваа книга. Останатите преводи од англиски јазик се на уредниците/чките, а републикуваните преводи се на Габриела Ивановска, Елизабета Шелева и Роберт Алаѓозовски.

За дизајнот благодарни сме му на Дарко Алексовски, кој стои зад визуелното решение и успеа да го нареди овој лавиринт од дисциплини, автори и аргументи во една јасна, логична и визуелно силна целина. 

Лектурата е на Виолета Танчева-Златева, а печатењето на ДАТА-ПОНС – Скопје.

Материјалот е реализиран од страна на Коалиција МАРГИНИ, а е целосно или делумно финансиран од Heinrich Böll Foundation – Sarajevo, Шведска и Фондацијата Kvinna till Kvinna, кои не мора нужно да се согласуваат со изнесените ставови. За содржината единствено се одговорни уредниците и авторите на текстовите.

Ја цениме можноста што во овие прекаријатни услови можеме да работиме на она во што навистина уживаме: да отвораме простор, да поврзуваме знаења, да градиме контекст каде критичкото мислење е жива, секојдневна практика.