Успешно одржана Регионалната конференција за финансиска писменост на младите во Радовиш

На 17 јуни 2025 година, во просториите на Креативниот Центар на заедницата НЕКСУС во Радовиш, се одржа Регионалната конференција „Финансиска писменост за млади“ – настан кој отвори важни прашања и актуелизираше теми поврзани со финансиската едукација на младите, нивната економска самостојност и улогата на сите чинители во заедницата во подигнување на финансиската култура.

Конференцијата обедини над 30 учесници од Југоисточниот регион – млади луѓе, наставници, претставници од локалните самоуправи, бизнис-секторот и граѓански организации – кои заеднички дискутираа за реалните предизвици со кои младите се соочуваат во доменот на финансиското знаење и управување со лични средства.

Во текот на четиричасовната програма, беа разработени четири клучни теми:

• Финансиска едукација и формалното образование – Учесниците отворија дебата зошто финансиската писменост сè уште не е дел од наставните програми, како младите стекнуваат (или не стекнуваат) знаења за пари и што може да се преземе за да се подобри оваа состојба преку неформално и партиципативно учење.
• Потрошувачка култура и “брзите пари” – Преку реални примери, беше нагласено влијанието на социјалните мрежи врз младите, прекумерното трошење и лесната достапност до микро-кредити и онлајн купување. Се дискутираше за потребата од критичко размислување и развој на свесни навики кај младите.
• Психологија на парите – Сесијата ги анализираше емоционалните аспекти на трошењето, врската помеѓу личните вредности и финансиските избори, како и важноста на самодисциплината и поставување приоритети.
• Буџетирање на различни нивоа – Од личен до општински буџет: се разговараше за улогата на планирањето кај младите, но и кај институциите, бизнисите и граѓанските организации, при што беше нагласено значењето на транспарентноста, одговорноста и заедничкото вклучување во процесите на креирање и следење на буџети.

Особено интересна беше и сесијата „Млади прашуваат – експерти одговараат“, каде младите поставуваа конкретни прашања до финансиски советници и претставници на институции – од теми како штедење, поставување буџет, до избор на апликации за следење трошоци и справување со долгорочни финансиски цели.

Покрај едукативниот карактер, конференцијата служеше и како платформа за вмрежување, размена на идеи и поттикнување нови иницијативи во локалните заедници. Учесниците ја изразија потребата овие теми да добијат континуитет и да се доближат уште повеќе до младите – преку работилници, обуки, дигитални ресурси и соработка со образовни институции.

Конференцијата беше организирана како дел од проектот „Младинска мрежа за финансиска писменост на Југоистокот“, кој има за цел да го подобри нивото на финансиска писменост, да овозможи практични алатки и пристап до ресурси за младите од Југоисточниот регион. Проектот е поддржан од Владата на Швајцарија преку програмата Цивика мобилитас, а го спроведуваат здруженијата КРУНА ПЛУС од Радовиш, Промо Идеа и Новус од Струмица.