СРЕДБА СО ПРЕТСЕДАТЕЛОТ НА РЕПУБЛИКА СЕВЕРНА МАКЕДОНИЈА
На барање на Центарот за еколошка демократија ФЛОРОЗОН и Македонското здружение на млади правници, одржавме работен состанок со претседателката на Република Северна Македонија, Н.Е. г-ѓа Гордана Силјановска-Давкова.
Дискусијата се фокусираше на актуелните предизвици во животната средина, ограничувањата со кои се соочува граѓанското општество и позицијата на Северна Македонија во однос на глобалните климатски политики и обврските за интеграција во ЕУ во секторот за животна средина.
Посебен акцент беше ставен на владеењето на правото и потребата од посилна партиципативна демократија, особено во процесите на изготвување, консултации и усвојување на ново законодавство. Исто така, разговаравме за важноста на усогласувањето со законодавството на ЕУ за животна средина (Поглавје 27) – не само како технички услов, туку како суштински процес што бара транспарентност, институционална одговорност и ефикасни механизми за учество на јавноста.
Сметаме дека овој состанок е важен чекор кон воспоставување редовен дијалог и партнерство меѓу институциите и граѓанското општество, со јасна цел: посилна заштита на животната средина, посилни демократски процеси и зголемена институционална одговорност.
Оваа вест изворно е објавена на веб-страната на Здружение на граѓани ФЛОРОЗОН-Центар за еколошка демократија Скопје
