Нови мали акциски грантови за граѓанските организации
Комисијата за избор на грантови ги оцени 45-те концепти кои организациите ги поднесоа во третиот круг од повикот за мали грантови на Цивика мобилитас (ЦМ-МАК-02).
Добитници на мал грант се седум организации и тоа:
- Здружение на Ромите Черења Штип со проектот „Биди храбра и не молчи за семејното насилство“;
- Здружение Центар за хумани односи Крушево со проектот „Здружување и јакнење на згрижувачките семејства во општина Крушево – Инклузија во заедницата“;
- Здружение за развој на слободно информациско општество „Слободен Софтвер Македонија“ Скопје со проектот „Отворени податоци за отворена иднина“;
- Здружение на граѓани ЛЕГИС Скопје со проектот „Следење на пристапот до човековите права на бегалците и мигрантите во Република Северна Македонија“;
- Здружение за одржлив развој ЧЕТВРТИОТ ЛИСТ Скопје со проектот „За вода се работи!“;
- Здружение на граѓани за социјален и економски развој ИН ВИВО Скопје со проектот „ЈОДА“;
- Центар за стратегиски истражувања и анализи – ЦСИА со проектот „Платформа за граѓански мониторинг на безбедносните агенции“.
Новите грантисти ќе работат на одржлива ресоцијализација на бездомни лица, ќе го подобрат пристапот до човекови права и заштитата за бегалци и мигранти во земјава, ќе ги охрабрат жените Ромки да го пријават семејното насилство, а исто така ќе ги здружат членовите на згрижувачките семејства на лицата со пречки во развојот во општина Крушево. Покрај тоа, тие ќе подготват документарен филм за состојбата на квалитетот на водата и опкружувањето по течението на реката Вардар, ќе го зголемат разбирањето и употребата на отворени податоци кај граѓанските организации, а исто така ќе вршат граѓански надзор врз спроведувањето на надлежностите и функционирањето на безбедносните институции.
Акциите на новите грантисти ќе се однесуваат на лица со посебни потреби, родови прашања, отчетност, човекови права, животна средина и вработување.
Проектите ќе се спроведуваат во Штип, Крушево, Скопје, во пограничните транзитни центри Табановце и Винојуг, додека четири од проектите ќе се спроведуваат на национално ниво.
Вкупниот буџет на поддржаните акции во овој квартал изнесува 2.243.950 денари.
Повикот за аплицирање за мали грантови останува отворен до 30 јуни 2022 г. Концептите може да бидат доставени во кое било време до овој датум. Комисијата за избор на малите грантови ќе носи одлуки на квартално ниво.
