На граѓанскиот и бизнис секторот им се потребни партнерства за одржлива соработка

„Од краткорочни донации кон долгорочни партнерства“! Ова беше главната порака на работилницата „Зајакнување на соработката помеѓу приватниот сектор и граѓанското општество“, што се одржа на 10 јуни во Скопје. Повеќе од 20 претставници на граѓански организации разговараа за тоа како соработката со компаниите може да се развие во одржлив модел што создава пошироко општествено влијание, наместо да остане на ниво на ад хок поддршка на настани и активности.

Учесниците работеа и дискутираа со Сајмон Форестер, меѓународен експерт на Цивика мобилитас кој сподели европски практики за структурирана и долгорочна соработка меѓу граѓанскиот сектор, бизнисот и институциите.

Форестер посочи дека во повеќе европски земји соработката не се сведува на донации, туку на воспоставени партнерства со јасни правила и заеднички цели. Како пример ја наведе Данска, каде постои „Компакт“ – документ кој поставува заеднички принципи за соработка. „Тоа е корисно бидејќи организациите можат да се повикаат на него кога сакаат да соработуваат со компании“, истакна тој.

Тој додаде дека корпоративната општествена одговорност сè повеќе станува рамка за заедничко делување, при што во земји како Данска, Ирска и Италија се развиваат партнерства во областите поврзани се вработување, образование, социјална инклузија и локален развој.

Посебно внимание предизвика дискусијата за состојбите во Северна Македонија. Учесниците споделија искуства кои покажуваат дека компаниите најчесто поддржуваат конкретни настани и активности, додека многу поретко се вклучуваат во подолгорочни партнерства што придонесуваат за развојот и одржливоста на самите организации.

Претставници на повеќе организации посочија дека соработката со локалните бизниси често се гради постепено, преку лични контакти, доверба и континуирана комуникација. Беа споделени примери на компании кои обезбедуваат финансиска поддршка, опрема, производи или услуги за реализација на активности од јавен интерес, но и искуства кои покажуваат колку е тешко организациите да го објаснат и претстават своето влијание пред потенцијалните поддржувачи.

„Тешко е да ги убедите луѓето за нешто што за нив е апстрактно да ви дадат средства. За тоа треба многу работа, а ние како организации немаме тимови кои работат само на филантропија“, рече Маргарита Гулевска од „Отворете ги прозорците“.

Во дискусијата посебно внимание беше посветено на довербата како предуслов за успешна соработка. Ирина Хаџи-Митова од Конект зборуваше за искуствата во поврзувањето на компаниите и граѓанските организации, нагласувајќи дека многу организации сè уште недоволно ги користат можностите што ги нуди локалната бизнис заедница.

„Не треба да ги гледаме компаниите како голема вреќа со пари. Комуникацијата, релацијата и довербата се клучни“, порача Хаџи-Митова.

Таа посочи дека само мал дел од компаниите во земјата соработуваат со граѓански организации и дека постои значителен неискористен потенцијал за развој на партнерства кои ќе придонесат за решавање на локални проблеми и подобрување на квалитетот на живот во заедниците.

Елена Петрушевска од Стопанската комора за информатички и комуникациски технологии МАСИТ зборуваше како претставник од бизнис секторот. Таа посочи дека компаниите секојдневно добиваат голем број барања за поддршка и затоа е особено важно организациите да настапуваат со јасно дефинирани цели, конкретни предлози и реални очекувања.

„Потребно е повеќе да се зборува за успешните приказни и јавноста да може да ги види придобивките и од едната и од другата страна. Потребен е отворен разговор и јасно дефинирани цели“, истакна Петрушевска.

Во дискусијата се вклучи и Снежана Камиловска од МЦМС, која посочи дека граѓанските организации и бизнис секторот треба да бараат заеднички интереси и да развиваат партнерства и во областа на застапувањето и креирањето јавни политики. Според неа пристапот до коморите треба да биде приматот, и како што истакна „тие треба да бидат вклучени во се што правиме“.

Учесниците се согласија дека за поуспешна соработка е потребно подобро меѓусебно разбирање, почеста комуникација и градење долгорочни односи засновани на доверба и заеднички вредности. Како особено важна беше посочена потребата граѓанските организации да го прикажуваат своето влијание на поразбирлив и подостапен начин, а компаниите да ги препознаат како партнери во решавањето на општествените предизвици.

Работилницата заврши со вмрежување на учесниците и разговор за можностите за нови партнерства, заеднички иницијативи и пристап до домашни и европски извори на поддршка.

„Навистина уживав во работилницата и можам да кажам дека сите три сесии беа исклучително квалитетни и инспиративни. Особено ми се допадна што беа споделени не само позитивни и веќе докажани практики, туку и предизвици и искуства кои не секогаш дале посакувани резултати. Ваквата искреност и размена на различни перспективи ја прави дискусијата побогата и покорисна за сите учесници“, изјави Сара Николовска од „Младите можат“.