#Зелен Петок: „Размена наместо отпад“ – мали навики со големо влијание

Со голем интерес и позитивна енергија се реализираше шестото издание на „Зелен Петок“, повторно посветено на иницијативата „Размена наместо отпад“. Настанот беше организиран како одговор на интересот на граѓаните кои не успеаја да се вклучат претходниот пат, а овојпат покажа дека ваквите акции имаат вистинска вредност и потенцијал да прераснат во редовна практика.

На настанот учествуваа околу 20 учесници, најголемиот дел млади, кои активно се вклучија во размената на предмети: облека, книги, домашни работи и други употребливи предмети. Просторот беше исполнет со динамика, но и со чувство на заедништво и споделување, каде секој донесе нешто свое, а замина со нешто што му е потребно.

Покрај самата размена, настанот отвори и важни разговори за одржливо живеење, намалување на отпадот и важноста на реупотребата. Учесниците дискутираа за тоа како секојдневните избори влијаат врз животната средина и како мали промени во навиките можат да имаат значаен ефект.

Особено охрабрувачки беше ставот на голем дел од учесниците кои ја препознаа размената не само како еднократен настан, туку како пракса што треба да стане дел од нивното секојдневие. Токму оваа промена во перцепцијата – од настан кон навика – е еден од најзначајните резултати од ова издание на „Зелен Петок“.

Со вакви иницијативи, заедницата прави чекор напред кон поодговорно и солидарно живеење, каде вредноста на предметите не завршува со нивната прва употреба.

*Активноста е во рамки на проектот „Еко иницијатива: граѓаните и локалната власт во акција за заштита на животната средина!“, имплементиран од Здружение СТАНИЦА ПЕТ, во рамки на програмата за подгрантирање на проектот „Добро владеење во животната средина на Зелена Агенда за Западен Балкан”, имплементиран од Центарот за правни истражувања и анализи, Македонското здружение на млади правници и Фронт 21/42, а е финансиски поддржан од Европската унија.

This post was originally published on this site