Заедничко создавање на безбеден простор

ХОПС веќе со години создава различни модели на поддршка, насочени кон ранливи групи и кон новите генерации. Искуството од работата со едните го користиме за да ги поддржиме другите, секогаш барајќи нови патишта што младите навистина ги разбираат и прифаќаат. Ова искуство сега нè води кон нов дигитален простор, наменет да биде и инфо-центар и место за поддршка, отворено за сите што сакаат да знаат повеќе за новите психоактивни супстанции и да останат безбедни.

Trip Tapes Македонија е младинска harm reduction заедница создадена во рамките на NextGen проектот на ХОПС, со цел да одговори на новите предизвици поврзани со употребата на нови психоактивни супстанции (НПС) меѓу младите. NextGen започна како обид да се вклучат младите генерации во дизајнирањето на пораки и содржини што се автентични за нивната култура и секојдневие, наместо да се користат стари и застарени пристапи кои младите веќе не ги слушаат и не им веруваат.

Првата активност беше креирањето на Instagram каналот Trip Tapes Македонија, кој брзо привлече заедница од млади што се препознаа во неговиот стил: директен, без осуда, со мемиња, реални приказни и aftercare потсетници. Trip Tapes стана првиот канал кај нас што зборува за НПС од перспектива на младите, со фокус на намалување на штети и промовирање на свесност и грижа.

Заедницата се прошири и со објавување на анкети и истражувања што ни помогнаа да разбереме што младите навистина ги интересира – нивните дилеми, стравови и навики. Овие податоци станаа основа за понатамошни активности. Потоа, експериментиравме со отворање на Reddit каналот GlitchNauti, кој брзо беше цензуриран и затворен од алгоритмите што не прават разлика меѓу промоција на дроги и harm reduction содржини за помош и поддршка. Овој момент уште еднаш ја нагласи потребата младите да имаат сопствен, безбеден простор, независен од комерцијални платформи. Во подготовка е и нов портал кој ќе биде информативен и едукативен, со можност за разговор еден-на-еден и професионална помош и поддршка во врска со новите психоактивни супстанции.

Trip Tapes денес не е само Instagram профил – тоа е и музички подкаст на SoundCloud, кој носи звук и ритам на младинската сцена. Преку музиката, младите повторно се препознаваат, се поврзуваат и градат заедница што оди подлабоко од инфо-постови: таа станува дел од нивната култура.

Со други зборови: Trip Tapes е автентичниот глас и креативниот пулс на младите генерации што им овозможува тој глас да стане поддршка, сигурност и заедничка грижа.

Финансирано од Европската Унија. Ставовите и мислењата искажани во оваа објава се исклучиво на авторите и не ги одразуваат нужно ставовите на Европската Унија или на АНПЦДЕФП. Европската Унија и АНПЦДЕФП не сносат одговорност за нивната содржина

The post Заедничко создавање на безбеден простор appeared first on ХОПС.

Оваа вест изворно е објавена на веб-страната на Здружение ХОПС – Опции за здрав живот Скопје