Соларен саем во Прилеп: Од потрошувачи до активни учесници во енергетската транзиција

На 16 септември, на Градскиот плоштад во Прилеп, се одржа петтиот и последен Соларен саем од серијата настани организирани од Центарот за климатски промени со цел обновливите извори на енергија и можностите за нивно користење да се доближат до граѓаните.

Настанот им овозможи на посетителите на едно место да добијат практични информации за сончевата енергија, фотонапонските системи и можностите домаќинствата да произведуваат сопствена електрична енергија. Посебен фокус беше ставен на концептот на просумер и на улогата што граѓаните можат да ја имаат како производители, а не само како потрошувачи на енергија.

Преку директни разговори, информативни материјали и интерактивни активности, посетителите имаа можност подобро да ги разберат придобивките од сончевата енергија и практичните чекори што стојат зад одлуката за поставување сопствен фотонапонски систем.

Токму пристапот до јасни и разбирливи информации е важен за граѓаните да можат да донесуваат информирани одлуки за сопственото учество во енергетската транзиција. Преминот кон чиста енергија не зависи само од големите инвестиции и политики, тој се гради и преку домаќинствата, локалните заедници и граѓаните кои одлучуваат активно да станат дел од промената.

Со Соларниот саем во Прилеп беше заокружена серијата од пет Соларни саеми одржани во Охрид, Струга, Кичево, Битола и Прилеп. Преку нив, информациите за сончевата енергија, фотонапонските системи и просумерите беа донесени директно до локалните заедници, со цел да се поттикне поголема информираност и активно учество на граѓаните во создавањето почист и поодржлив енергетски систем.

Изразуваме благодарност до Go Green – Биди Зелен за нивниот придонес и поддршка во реализацијата на настанот.

„Соларен саем Прилеп“ е организиран од Центарот за климатски промени во рамки на проектот „Зајакнување на позитивната перцепција за процесите на праведна транзиција на локално ниво“, во рамки на NDICI CHALLENGE/2024/455-010 „Финансирање на поправедни иднини: Проширување на ангажманот и овозможување на инклузивна и родово трансформативна климатска правда во Европа и пошироко“, координиран од CAN Europe и кофинансиран од Европската Унија.