ШТО ЗНАЧИ ДА СЕ ВЕРУВА ВО ДЕМОКРАТИЈАТА ВО 2026 ГОДИНА?

ХЕРА Млади: Нашата иднина нема да ја избере алгоритам – ќе ја изградиме ние

По повод 15 септември – Меѓународниот ден на демократијата, ХЕРА Млади потсетува дека демократијата не е само изборен ден или институција. Таа има смисла кога ја чувствуваме во секојдневниот живот – кога можеме слободно да зборуваме, да учествуваме во одлуките што нè засегаат и да бараме одговорност и промени.

Во видеото што го објавуваме по повод Меѓународниот ден на демократијата, младите од ХЕРА зборуваат за тоа што значи демократијата денес и како современиот начин на информирање и комуникација влијае врз нашите ставови, односи и учество во општеството.

Сè поголем дел од јавниот живот се одвива во дигиталниот простор, каде алгоритмите влијаат врз тоа што гледаме, што читаме, со кого комуницираме и кому му веруваме. Наместо да нè поврзуваат, тие можат да нè затворат во паралелни светови и да ги продлабочат поделбите.

„Денеска демократијата е под опасност од таканаречената алгоритмократија. Во алгоритмократијата власта не припаѓа веќе кај луѓето, туку средината е уредена од алгоритмите“, вели Виктор Бучковски од ХЕРА Млади.

Демократијата бара нешто сосема спротивно – средба, разговор, различни идеи и можност луѓето заедно да носат одлуки. А тоа започнува од секојдневното учество на младите.

„Денес демократија значи да може да дадете критика, пофалба или едноставно да кажете нешто и тоа да биде слушнато, разбрано и дејствувано“, вели Ема Мицевска.

Затоа младинското учество не смее да биде формалност. Младите треба да бидат вклучени уште од почетокот во креирањето на законите, политиките и буџетите што го определуваат нивниот живот. Демократијата се мери и преку квалитетно образование, достоинствена работа, достапно домување, чист воздух и грижа за менталното и физичкото здравје.

Од институциите бараме повеќе простор за суштинско младинско учество, образование што развива критичко мислење и медиумска и дигитална писменост, отпорност кон дезинформации и услови младите достоинствено да живеат и да ја гледаат својата иднина тука.

Како што порачува Виктор во видеото: „Задачата на нашата генерација е да создаде можности за среќавање и простор во кој ќе можеме заедно да градиме подобро општество – обединети, а не како во алгоритмите, секој на своја страна разединети.“

Ние не сме публика, кликови или податоци. Ние сме граѓани и двигатели на промените.

Нашата иднина нема да ја избере алгоритам. Ќе ја изградиме ние.

ХЕРА Млади

Линк до видеото на ХЕРА Млади по повод 15 септември – Меѓународниот ден на демократијата: https://www.youtube.com/watch?v=f3G8rkZ0M58