Oнлајн сесија за добри локални практики за животна средина: РЕДИ Рециклажа

На 29 јуни 2026 година, Здружение СТАНИЦА ПЕТ организираше онлајн сесија посветена на иницијативата REDI Recycling, која се одржа преку платформата Zoom, со паралелен пренос во живо на Facebook.

Гостин на настанот беше Лејла Зекировска, проектен менаџер во Иницијативата за економски развој на Ромите – REDI, која ја презентираше иницијативата REDI Рециклажа – ромско социјално претпријатие кое работи на формализирање на неформалните собирачи на отпад и нивно препознавање како „Зелени агенти“. Преку својата работа, иницијативата придонесува кон развојот на циркуларната економија, подобрување на селекцијата на отпадот, особено пластика и хартија, како и кон создавање достоинствени можности за вработување и социјална инклузија на ранливите категории граѓани.

Во текот на сесијата беа презентирани искуствата од воспоставувањето и функционирањето на REDI Рециклажа, постигнатите резултати, како и предизвиците со кои се соочува иницијативата. Се разговараше и за можностите ваквиот модел да се преслика во други општини, како и за важноста на соработката помеѓу граѓанските организации, локалните самоуправи, јавните претпријатија и приватниот сектор во создавањето одржливи системи за управување со отпад.

Посебен интерес предизвика Facebook преносот во живо, преку кој следачите активно се вклучија во дискусијата со прашања и коментари. Најголем дел од прашањата се однесуваа на обезбедувањето долгорочна одржливост на иницијативата, можностите моделот да се имплементира во помали и рурални средини, потребните човечки, финансиски и институционални ресурси за започнување на вакви иницијативи, предизвиците кои можат да се појават при имплементација, како и предусловите за успешно формализирање на неформалните собирачи на отпад.

Настанот претставуваше значајна можност за размена на знаења и добри практики, поттикнувајќи дискусија за иновативни пристапи кон заштитата на животната средина, развојот на циркуларната економија и унапредувањето на локалниот активизам.

*Активноста е во рамки на проектот „Еко иницијатива: граѓаните и локалната власт во акција за заштита на животната средина!“, имплементиран од Здружение СТАНИЦА ПЕТ, во рамки на програмата за подгрантирање на проектот „Добро владеење во животната средина на Зелена Агенда за Западен Балкан”, имплементиран од Центарот за правни истражувања и анализи, Македонското здружение на млади правници и Фронт 21/42, а е финансиски поддржан од Европската унија.

This post was originally published on this site