Извршната директорка на ЕСЕ зборуваше за родовите перспективи во борбата против корупцијата и градењето деловен интегритет

На 25 јуни 2026 година, во организација на Едукативниот центар М6, Францускиот фонд за борба против корупцијата и Expertise France, се одржа настан посветен на деловниот интегритет, антикорупцијата и зајакнувањето на соработката меѓу институциите, бизнис-секторот и граѓанското општество.

Настанот ги обедини претставниците на јавните институции, приватниот сектор, граѓанските организации и меѓународните експерти, со цел размена на искуства и отворање дискусија за тоа како да се гради предвидлива, транспарентна и интегритетна деловна средина. Во рамки на програмата се дискутираше за улогата на јавниот сектор во превенцијата на корупцијата, значењето на колективната акција, меѓународните стандарди за корпоративна усогласеност и практичните искуства во развојот на антикорупциски програми и програми за управување со ризици.

На настанот учествуваше и извршната директорка на ЕСЕ, Јасминка Фришчиќ, која говореше во рамки на панелот „Градење инклузивен деловен интегритет преку колективна акција“. Во своето обраќање, таа ја истакна потребата борбата против корупцијата да ја вклучи и родовата и социјалната перспектива.

Извршната директорка на ЕСЕ нагласи дека корупцијата не е родово неутрална, бидејќи жените и мажите, како и различните групи граѓани, не се еднакво изложени на ризици, ниту имаат еднаков пристап до информации, услуги, правда и механизми за пријавување неправилности. Последиците од корупцијата зависат од тоа кој има моќ, кој има пристап до информации, кој има економска сигурност и кој може безбедно да пријави неправилност.

Во своето обраќање, таа посочи дека деловниот интегритет не треба да се разбира само како внатрешна политика или процедура во компаниите, туку како пошироко прашање на јавна доверба, еднаков пристап до услуги и можности, отчетност и заштита на јавниот интерес. Според ЕСЕ, интегритетот не може да се гради само преку соработка меѓу институциите и големите компании. Во тој процес мора да бидат вклучени и граѓаните, локалните заедници, малите бизниси, жените, ранливите групи и граѓанските организации.

Посебен акцент беше ставен на искуството на ЕСЕ во областа на здравството, преку проектот „Посилен систем за поправедна заштита: Намалување на корупцијата во здравството“, финансиран од Француската агенција за развој – AFD, а имплементиран од Expertise France. Извршната директорка на ЕСЕ истакна дека корупцијата во здравството не е само прашање на поткуп, неформални плаќања или подароци, туку директно влијае врз здравјето, достоинството, безбедноста и довербата на пациентите.

Таа посочи дека здравството е особено важно за родова анализа, бидејќи жените почесто користат одредени здравствени услуги, особено услуги поврзани со репродуктивното здравје, бременоста, породувањето и грижата по породувањето. Тоа ги прави поизложени на посебни ризици, притисоци или несоодветен третман. Дополнително, беше истакнато дека антикорупциските механизми треба да ги препознаат не само класичните форми на корупција, како барање пари или подарок, туку и непаричните и родово специфични форми на злоупотреба на моќ, вклучително и сексторцијата.

Пораката на ЕСЕ е дека е потребен родово чувствителен антикорупциски пристап, заснован на транспарентност, отчетност, безбедни канали за пријавување неправилности, подобро информирање на граѓаните за нивните права и вклучување на гласот на оние што најмногу ги чувствуваат последиците од корупцијата.

ЕСЕ продолжува да се залага за интегритет кој нема да остане само формална заложба или декларација, туку ќе стане секојдневна пракса во институциите, компаниите и во нивната соработка со граѓаните. Само преку јавна доверба, фер правила и вистинско вклучување на граѓаните може да се гради посилен, поправеден и поинклузивен систем.

На 25 јуни 2026 година, во организација на Едукативниот центар М6, Францускиот фонд за борба против корупцијата и Expertise France, се одржа настан посветен на деловниот интегритет, антикорупцијата и соработката меѓу институциите, бизнис-секторот и граѓанското општество.

На настанот учествуваше и извршната директорка на ЕСЕ, Јасминка Фришчиќ, која говореше во рамки на панелот „Градење инклузивен деловен интегритет преку колективна акција“.

Во своето обраќање, таа зборуваше за родовите перспективи во борбата против корупцијата и потребата антикорупциските политики да ги препознаат различните ризици со кои се соочуваат жените, ранливите групи и граѓаните со ограничен пристап до информации, услуги и механизми за заштита.

Корупцијата не е родово неутрална и не ги погодува сите луѓе на ист начин. Затоа, интегритетот мора да се гради преку транспарентност, отчетност, безбедни канали за пријавување и вклучување на оние кои најмногу ги чувствуваат последиците од неправилностите и злоупотребата на моќ.

ЕСЕ продолжува да се залага за родово чувствителен и инклузивен антикорупциски пристап, во кој институциите, бизнис-секторот и граѓанските организации ќе соработуваат за поголема доверба, фер правила и заштита на јавниот интерес.