Национален акциски план за Партнерство за отворена власт 2026–2028

Се одржа средба на работните групи за подготовка на новиот Национален акциски план за Партнерство за отворена власт 2026–2028Денеска во Клубот на пратеници се одржа состанок на работните групи за подготовка на Националниот акциски план за Партнерство за отворена власт 2026–2028 (НАП7), како продолжение на процесот на ко-креација започнат со конференцијата организирана на почетокот на април оваа година. Настанот беше организиран од Министерството за јавна администрација, во соработка со Фондацијата Метаморфозис и Центарот за граѓански комуникации.

На настанот присуствуваше и Центарот за правни истражувања и анализи, како дел од граѓанскиот сектор вклучен во процесот на консултации и ко-креација на новиот акциски план.

Работниот состанок ги обедини претставниците на институциите, граѓанските организации и експертската јавност во тематски работни групи, со цел заедничко дефинирање на приоритетите и идните заложби во рамки на новиот акциски план.
Учесниците работеа во пет тематски области:

• антикорупција, интегритет, одговорност и отчетност;
• граѓански простор, учество и слободи;
• дигитално управување;
• клима и животна средина;
• отворен парламент и отворено судство.

Работниот состанок претставува важен чекор во инклузивниот ко-креациски процес на подготовка на новиот Национален акциски план, кој треба да придонесе кон поотворени, поотчетни и подостапни институции, во партнерство со граѓанското општество и другите засегнати страни.
Процесот на ко-креација на Националниот акциски план за Партнерство за отворена власт 2026–2028 продолжува во наредниот период преку дополнителни консултации и тематски дискусии со сите релевантни чинители.