Вести од граѓанските организации

Драги наши сограѓани и почитувани пријатели на здравјето,
Со секоја Нова Година, доаѓаат нови можности и надежи за подобро утре. Здравјето е основата на секое успешно општество, а неговото унапредување е заедничка одговорност. Нашите сервиси, кои го поддржуваат здравјето на најранливите, се пример за успехот што можеме да го постигнеме заедно. Но, потребно е повеќе – нови извори на поддршка и иновации кои ќе ни помогнат да продолжиме да бидеме пример за регионот.
Во изминатата година, со посветеност и труд, ХОПС покажа дека Македонија може да биде лидер во намалувањето на ХИВ и поддршката на ранливите групи. Нашите програми за намалување на штети се признати како пример за добри практики, и се гордееме со резултатите што ги постигнавме. Сепак, знаеме дека за да продолжиме со овој напредок, потребно е да ги зајакнеме постоечките ресурси и да најдеме нови начини за финансирање.
Македонија секогаш знаела да направи многу со малку – тоа е нашата приказна, нашето наследство. Но, прашањето е: дали сè уште сме тие луѓе? Дали ќе ги искористиме своите умови и срца за да ја претвориме оваа земја во вистински дом за сите? Здравјето не е само приватна работа, туку и јавен интерес, а јавниот интерес бара јавна акција.
Замислете го ова: една мала држава која ги надминува своите ограничувања. Држава каде што секое дете има пристап до најдобрите здравствени услуги, каде што секоја мајка знае дека има поддршка, каде што секој граѓанин чувствува дека е дел од голема, заедничка приказна. Ова не е утопија – ова е визија која бара само тимска работа, верба и малку повеќе љубов кон она што сме и што можеме да бидеме. Нека нашите напори не бидат само должност, туку и гордост – бидејќи здравјето е право, а не привилегија.
Затоа, во духот на Нова Година, ве повикуваме сите – институции, граѓани, донатори и соработници – да се прашаме: „Кога, ако не сега? Кој, ако не ние?“ Ова не е само момент за размислување, туку за акција. Нека Новата 2025 година биде година кога Македонија ќе покаже дека знае, сака и може. Заедно, за сите нас.
Со желба за здравје, просперитет и заедничка визија, Ваши, Тимот на ХОПС

Годинава остави зад себе бројни траги, а  дел од нив Цивика мобилитас успеа да ги долови и инспиративно да ги пренесе преку четири приказни кои ја одразуваат силата на граѓанскиот активизам и неговото влијание на општеството. Преку проектите поддржани од Владата на Швајцарија, тимот на Цивика мобилитас го следеше напредокот на осумнаесет тековни проекти низ 8 плански региони на Македонија, фокусирајќи се на примери со  успешни промени што беа резултат на поддржаните проекти.
Првата приказна ја посветивме на унапредувањето на здравствените права на девојките, жените и ранливите групи. Здружението за правата на жените на Шуто Оризари,  „Заедно посилни“ организираше форумите што создадоа платформи за размена на информации, и помогнаа во решавањето на проблемите на корисничките. Пристап до бесплатни задравствени услуги доби малолетна девојка благодарение на правната и медицинската помош од организацијата. Таа сега може да се грижи за себе и своето дете, без да се стравува од финансиски трошоци. Оваа приказна потврдува дека дури и малите акции можат да доведат до големи промени во животите на луѓето.
Втората приказна е поврзана со проектот на Женската граѓанска иницијатива „Антико“ од Скопје, која во партнерство со „Секогаш соживот“ од село Канатларци и „Адрион“ од Желино, овозможи едукација за економска независност и вработување на жени од четири општини. Преку организирањето на бесплатни курсеви за професионални козметичарки во Тетово, Кочани, Прилеп и Могила, проектот помогна на повеќе од 30 жени кои ќе им помогнат да се вклучат на пазарот на труд и да ја зајакнат својата економска независност. Таква е приказната на Е.А., самохрана мајка на три деца од Тетово, која ја започнува својата професионална кариера во козметичката индустрија благодарение на бесплатниот курс. За Е.А., овој курс не беше само едукација, туку шанса да обезбеди подобра и посигурна иднина за себе и своите три деца. Љубовта и посветеноста на своето семејство, заедно со желбата за финансиска независност, ја поттикнаа да ги преземе одлучувачките чекори. Преку оваа приказна, покажуваме како граѓански иницијативи можат да го променат животот на жените и да ги охрабрат за нови можности.
Тркалезната маса во Неготино, што беше дел од проектот „Да се соочиме со предизвиците и стигматизацијата“ организирана од Центарот за помош на лица со ментален хендикеп „Порака“, „Еко-Живот“ од Кавадарци и Здружението на лица со церебрална парализа и други попречености од Велес, не беше само место за размена на идеи, туку и за дефинирање на конкретни акции. Овој настан беше многу повеќе од споделување на проблеми, тој беше повик за акција. Иницијативата за создавање на платформа „Пристапен доктор“ и предложените промени во системот за здравствена заштита, како и едукација на докторите, имаат потенцијал да го олеснат животот на стотици семејства во Македонија. Оваа тркалезна маса потсети дека инклузијата не е само одговорност на одредени групи, туку на целото општество, кое треба да работи заедно за да создаде средина во која сите се ценети и почитувани. Проектот предвидува мултидисциплинарни центри и едукации за докторите, има потенцијал да ги подобри здравствените услуги и да го направи здравствениот систем поинклузивен за сите.
Потоа ја објавивме приказната што се фокусира на еколошката свест и иновацијата. Таа е дел од проектот „Граѓански активизам за остварување на циркуларна економија во управувањето со органски отпад“ на Центарот за ресурси во животна средина (РЕЦ). Работилниците за циркуларна економија и преработка на биоотпад, кои ги организираа заедно со Еко Логик и Флорозон, не само што помогнаа младите да стекнат нови вештини, туку и ги воведоа во процесите на создавање одржливи решенија за животната средина. Овие активности придонесоа за подигнување на свеста и активирање на нова генерација која ќе работи на зачувување на природните ресурси и создавање на одржливи решенија за идните предизвици. Досега се одржаа пет работилници на кои учествуваа 95 ученици и 9 наставници од основните училишта „Димо Хаџи Димов“ од Општина Карпош, „Св. Климент Охридски“ и „Кирил Пејчиновиќ“ од Кисела Вода, како и „Војдан Чернодрински“ и „Страшо Пинџур“ од Ѓорче Петров. Овие се дел од планираните 20 работилници, кои ќе продолжат да се реализираат до октомври 2026.
Со овие четири инспиративни приказни, Цивика мобилитас успеа да ги долови најзначајните промени што ги направија грантистите, поттикнувајќи социјален активизам и промени во општеството. Веруваме дека ова е само почеток за резултатите што не очекуваат во иднина.
 

Следно >

Поврзани:

На 26 декември 2024 се одржа онлајн обука за избраните грантисти на повикот за акциски грантови за локални иницијативи. На настанот беа обучени претставници на 28 организации, кои во следните девет месеци ќе спроведуваат акциски грантови за локални иницијативи во шестте различни области: Подобрување на околината за развој на граѓанското општество; Добро управување, владеење на правото и борба против корупција; Локален економски развој, социјална економија и социјална инклузија; Зелена агенда: климатски промени, животна средина и чиста енергија; Родова еднаквост и млади; Здравје, здравствена заштита и здравствена култура.

Грантистите преку своите локални иницијативи ќе работат на справување со различните локални предизвици на целните групи како зголемување на транспарентноста и отчетноста на локалните власти, јакнење на локални младински совети и формирање на младински парламенти, зголемување на вклученоста на жените и младите во локалните процеси на донесување одлуки, зголемување на социјалната и економската вклученост на младите и жените од различни етнички заедници, подобрување на социјалната вклученост на старите лица, јакнење на отпорноста на локалната заедница кон климатските промени и  справување со еколошките проблеми, справување со корупцијата, подобрување на можностите за квалитетна палијативна нега во домот и други предизвици. Повеќе детали за локалните иницијативи на овие 14 акциски грантови се достапни на веб-страната на Граѓанскиот ресурсен центар.
Во однос на регионалната покриеност на грантовите два гранта ќе се спроведуваат во Скопскиот регион, два во Југозападниот регион, еден во Југоисточниот регион, два во Североисточниот регион, два во Источниот регион, по еден грант во Пелагонискиот и Полошкиот регион, Полошкиот и Југозападниот регион, Североисточниот и Источниот регион и во Пелагонискиот и Југозападниот регион.

На обуката, грантистите се запознаа со клучните правила и процедури за спроведување на проекти финансирани од Европската Унија, како што се финансиското работење и потребни пропратни документи за финансиски известување, набавки за добра и услуги на проект, процесите на известување и мониторинг, комуникација и видливост.
Акциските грантови за локални иницијативи се дел од проектот „ЕУ поддршка на Граѓанскиот ресурсен центар – фаза 2“ финансиран од Европската Унија, а спроведуван од Националната фондација за развој на граѓанско општество Граѓански ресурсен центар, Македонскиот центар за меѓународна соработка, Медиа плус, Штип и Асоцијација за демократски иницијативи – АДИ, Гостивар.

< Пред   Следно >

Поврзани:

На 23 декември 2024, Младински Совет Прилеп беше дел од Завршната конференција, каде беа претставени предложените измени за подобрување на Законот за младинско учество и младински политики. 
Водени од трите национални мрежи: Коалиција на младински организации СЕГА, Национален младински совет на Македонија и Сојуз за младинска работа, а  со поддршка на младинските организации, се изработија предлози кои ќе ја унапредат младинската политика во земјава!

Со овие предлози, ќе осигураме дека: 

Ќе се формира Националното собрание на млади! 

Ќе се формира Национално советодавно тело!

Секој град ќе има Локален младински совет!

Ќе се отворат Младински Центри во секоја општина! 

Државата и општините ќе одвојат дел од буџетот за младински активности!

Ќе се воведат прекршочни одредби за градоначалниците кои нема да го спроведуваат законот!

Нашата цел е реално остварување на правото на младите на младинско организирање и младинско учество!

Здружение Центар за одржлив развој на заедницата Дебар за реализација на иницијативата  Иницијативата EmpowerHER!.  објавува:
Повик за понуди  За избор на обучувач 

За реализација на две модули обуки за млади
Модул 3: Личен РазвојДен 1: Поставување цели и управување со времетоОпис: Преку работилници и активности, учесниците ќе поставуваат лични и професионални цели.Тие ќе научат ефикасни техники за управување со времето за приоритизирање на задачите и постигнување на целите.
Ден 2: Самодоверба и комуникациски вештиниОпис: Оваа активност е фокусирана на зголемување на самодовербата и подобрување на комуникациските вештини.Учесниците ќе учествуваат во улоги, вежби за јавен говор и активности за градење самодоверба.
Ден 3: Управување со стресот и благосостојбатаОпис: Учесниците ќе истражуваат техники за управување со стресот, вклучувајќи внимателност и вежби за релаксација.Тие исто така ќе научат за севкупната благосостојба и значењето на грижата за себе.
Модул 4: Подготвеност за работа и кариерен напредокДен 1: Пишување ефективно CV и мотивациско писмоОпис: Во оваа работилница, учесниците ќе добијат насоки за создавање привлечни CV и мотивациски писма.Тие ќе разберат како да ги истакнат своите вештини и искуства на ефикасен начин.
Ден 2: Вештини и техники за интервјуОпис: Учесниците ќе вежбаат вештини за интервјуирање, вклучувајќи одговарање на честопоставувани прашања ипретставување со самодоверба. Ќе се организираат симулации на интервјуа и сесии за повратни информации.
Ден 3: Изградба на професионална мрежаОпис: Ќе се организираат настани за вмрежување за да им се помогне на учесниците да ги прошират своите професионални контакти.Тие ќе научат за значењето на вмрежувањето за кариерен напредок и ќе добијат насоки за воспоставување значајни врски.
Работни јазици за време на обуката ќе бидат македонски и албански.
Периодот на релаизација: Јануари-Април 2025 година во Дебар
Креан рок за доставување на понуди: 15 јануари 2025 година

Понудите заедно со Биографија да се достават на Contact@cscd.org.mk, или по пошта или лично во канцеларија на адреса: Центар за одржлив развој на заедницата Дебар ул.Велко Влаховиќ бр. 13 Дебар

За подетални информации тел.  070306652, 070972070 или на емаил Contact@cscd.org.mk

Иницијативата се спроведува во рамки на Активноста на УСАИД за млади кои активно создаваат можности, имплементирана од организацијата Унапредување на економиите за посилни заедници (IESC) во партнерство со Младински образовен форум и Центар за претприемачи и развој на менаџери Скопје.
Мислењата изразени во формуларот им припаѓаат на авторите Центарот за одржлив развој на заедницата Дебар и не ги изразуваат ставовите на УСАИД или на Владата на Соединетите Американски Држави.

Related

Во рамки на ЦЕ Академијата одржана од Арно имавме можност да се запознаеме со основите на циркуларната економија. Преку воведна презентација од проф. д-р Наташа Данилоска, беа претставени концептите на 8R и нивната примена во создавање одржливи бизнис модели. Дискусиите ја нагласија важноста на интегрирањето на циркуларните принципи во секојдневните проекти и организации.Што научивме од ЦЕ Академијата:Идентификација и развој на циркуларни бизнис модели: Како да се изработат иновативни решенија кои поттикнуваат реупотреба и намалување на отпадот.
Интегрирање на одржливост во организациите: Стратегии за долгорочно одржливо управување.
Планирање на социјално, економски и еколошки одговорни идеи: Како циркуларната економија може да генерира вредност за заедницата.
Иновативни решенија за намалување на отпадот: Идеи кои користат ресурси повторно и ја поддржуваат еколошката рамнотежа.Што следува во рамки на Академијата?Достапност на едукативни материјали: Академијата обезбедува ресурси за сите кои сакаат да дознаат повеќе за циркуларната економија и нејзините принципи.
Менторска поддршка: Учесниците ќе имаат можност да добијат насоки и поддршка за развивање на сопствени циркуларни идеи.
Развивање нови проекти: Академијата поттикнува креирање решенија кои имаат позитивно влијание врз животната средина, со фокус на иновации и одржливост.Нашето решение: Велосипедски паркинг БУРЕ-CycleКако дел од нашата посветеност на циркуларната економија, горди сме да го претставиме велосипедскиот паркинг БУРЕ-Cycle – иновативно и одржливо решение кое ги комбинира еколошките и функционалните аспекти на урбаното живеење.Што е велосипедски паркинг БУРЕ-Cycle?БУРЕ Cycle претставува паркинг за велосипеди изработен од реупотребени материјали, како што се:Метални буриња: Користени и отпадни буриња се преработуваат за создавање на основната структура на паркинзите.
Гуми за велосипеди: Наместо да завршат како отпад, старите гуми добиваат нова функција во рамките на нашиот дизајн.Ова решение:Намалува производството на нови суровини: Го поттикнуваме рециклирањето и минимизираме отпадот.
Е издржливо: Паркинзите се дизајнирани да издржат различни временски услови со минимално одржување.
Е економично: Ниските трошоци за производство и иновативниот дизајн ги прават достапни за широк спектар на корисници.Кој може да го користи БУРЕ-Cycle?БУРЕ-Cycle е иновативно решение кое може да го користи широк спектар на корисници, вклучувајќи училишта, општини, бизниси и заедници. Ова решение е особено корисно за градови со висок сообраќај на велосипеди, каде што БУРЕ-Cycle обезбедува одржливи и практични инфраструктурни решенија за паркирање на велосипеди. Локалните власти и образовни институции можат да ги користат паркинзите како дел од своите иницијативи за зголемување на еколошката свест и промовирање на зелените транспортни опции. Истовремено, бизнисите и заедниците можат да ги имплементираат како начин за промовирање на одржливи превозни средства, нудејќи ефикасни и достапни решенија за сите учесници во урбаниот живот.Како БУРЕ-Cycle е циркуларно решение?Ова не само што помага во зачувување на животната средина, туку исто така поттикнува економски развој преку создавање на нови можности за работа и иновации, преку намалено производство, но зголемено реискористување на веќе постоечки производи.

Промената започнува од нас, но најмногу од младите. Токму тие, со нови знаења и свесност, можат да бидат носители на позитивни промени во своето опкружување. Кога младите се запознаваат со предизвиците во нивната околина, стануваат активни учесници во процесот на трансформација.Ме инспирираа одржаните едукативни работилници на тема „Техники за трансформација на биоотпадот“, што ги организираше Центарот за ресурси во животна средина (РЕЦ) во партнерство со Еко Логик и Флорозон – Центар за еколошка демократија. Работилниците се одвиваа во биотехнолошката лабораторија во средното хемиско училиште „Марија Кири Склодовска“ во Скопје а беа наменети за ученици од основните училишта. Имав привилегија да присуствувам на една од работилниците и лично да ги набљудувам експериментите во друштво на учениците од ООУ „Кирил Пејчиновиќ“ од Кисела Вода.Тивки, многумина од нив срамежливи, учениците пристигнаа во лабораторијата. Како што ми објаснува Тамара Радовановиќ од РЕЦ, многу од учениците, овде, за прв пат се сретнуваат со ваков тип настава. „На почетокот се малку скептични и срамежливи, но како што напредуваат активностите, гледаат дека навистина станува збор за нешто интересно и значајно за нивната иднина“, вели таа, додека учениците ги облекуваат белите мантили и ги подготвуваат рацете за работа.Работилницата ја отвораат експертите Горан Трајковски и Само Суљовиќ од Јавното претпријатие „Дрисла“, како и Викторија Брндевска Стипановиќ од Факултетот за шумарски науки. Учениците заинтересирано слушаат, а атмосферата полека се менува. Од срамежливи ученици, тие станаа ентузијасти, подготвени да се вклучат во експериментите за одржливо управување со органски отпад.„Особено се интересни разновидните реакции на учениците кога успешно ќе го завршат експериментот. Во секој случај, со активностите кои ги правиме во текот на работилниците, ретко кој останал рамнодушен, ниту тие, ниту ние“, додава Тамара со насмевка.„Дали знаевте дека од кора од јаболка може да се добие пектин, кој потоа се користи за правење слатки и крем за лице? Или дека од масло од сусам може да се произведе биодизел?“ прашуваа експертите, пред да започнат со експериментите кои ги поттикнаа креативните способности на учениците.На работилницата се случуваше „хакирање на биоотпадот“. Процес кој звучи како нешто од научно-фантастичен филм, но во реалноста беше прилично практичен и инспиративен. Учеа како од кора од јаболка може да добијат пектин. Сведочеа и учествуваа во процесот на создавање биодизел од масло од сусам. Тоа беше свет на бескрајни можности, а јас го делев воодушевувањето на учениците од него.„За мене беше фасцинантно како од лушпи од јаболка можевме да создадеме материјал кој може да се користи за слатки или други производи“, ја сподели својата зачуденост со мене Сара Данова, ученичка од осмо одделение. Учениците беа целосно фокусирани, а телефоните исклучени. Тие активно учеа за процесите на преработка на биоотпадот и можностите за добивање на нови производи. Неколку часа подоцна, за прв пат ги употребија своите телефони за да ги фотографираат своите достигнувања, уверени дека она што го создале е вредно да се документира.„Процесот на чекање до финалната фаза и крајниот производ кога ќе се направи таа биопластика беше доста интересен. Имав чувство како да беше вистинска пластика“, рече Сара. Времето летна. По четири часа, се најдовме опкружени со малите научни достигнувања на учениците. Се гледаа само среќни лица и насмевки. „Првпат сум во ваква лабораторија, а делот кога го правевме пектинот ми беше посебно интересен“, рече Давид Цветановски, ученик од деветто одделение. „Прво што помислив беше дека тој може да биде корисен за правење колачиња, а со тоа и да не се фрлаат лушпите од јаболка за џабе. Нешто што е корисно во секојдневниот живот“.Искуствата од работилницата не беа само забава. Разговорот со обучувачите отвори нови перспективи за важноста на циркуларната економија. Според резултатите од едно истражување на Асоцијацијата на биогасни централи и производители на биомаса, 50 проценти од компаниите не се свесни за регулативите поврзани со биоотпадот, а 93 проценти веруваат дека нивниот отпад НЕ влијае негативно на животната средина. Токму овие бројки укажуваат на потребата од едукација и свест, нешто што беше евидентно на оваа работилница.Проектот продолжува со успешни активности, кои не само што ја зголемуваат свеста за циркуларната економија, туку и создаваат нови генерации што ќе придонесат за поодржлив развој на нашето општество. Досега се одржаа пет работилници на кои учествуваа 95 ученици и 9 наставници од основните училишта „Димо Хаџи Димов“ од Општина Карпош, „Св. Климент Охридски“ и „Кирил Пејчиновиќ“ од Кисела Вода, како и „Војдан Чернодрински“ и „Страшо Пинџур“ од Ѓорче Петров. Овие се дел од планираните 20 работилници, кои ќе продолжат да се реализираат до октомври 2026.„Среќни сме што благодарение на овој проект, поддржан од Владата на Швајцарија преку Цивика мобилитас, имаме можност да продолжиме да работиме и повторно да ја користиме лабораторијата. Во неа е вложено многу и едноставно е добро кога се користи за нејзината намена “, рече Мина Дамјановиќ од РЕЦ.„Овие експерименти не само што ни помогнаа да научиме нови работи, туку и да ги поврземе нашите знаења со она што се случува во природата и секој ден“, кажаа учениците, уверени дека она што го научиле ќе им биде корисно и во иднина.На крајот на денот, сите излеговме од лабораторијата со нова перспектива и ветување дека ќе ги пренесеме овие знаења. Инспирирани да продолжиме со истражување, учење и делење на она што го научивме.„Граѓански активизам за остварување на циркуларна економија во управувањето со органски отпад“ е проект на Центарот за ресурси во животна средина (РЕЦ) во партнерство со Здружението за заштита и унапредување на животната средина Еко Логик и Флорозон-Центар за еколошка демократија од Скопје.

Македонскиот центар за меѓународна соработка организираше три работилници посветени на родовата еднаквост во спортот. Настаните беа фокусирани на подигање на свесноста за родовата дискриминација и создавање стратегии за поддршка на еднакви можности за жените и мажите во спортските активности на националните спортски федерации и спортските клубови во Северна Македонија. Вкупно 44 учесници (26 жени и 18 мажи) од Скопје и Куманово дискутираа за потребата од промени во спортските политики за поголемо вклучување на жените во спортот.

Претставниците на федерациите и спортските клубови (раководни лица и спортисти) добија знаење за успешно да ја детектираат и превенираат дискриминацијата и достапните правни средства за заштита од неа со посебен осврт на дискриминацијата во спортот. Имено, со работилницата е создадено сеопфатно разбирање за дискриминацијата во сите нејзини форми, што треба да зголеми инклузивноста и застапеност на жените во спортот. Спортот е област каде родовите стереотипи се длабоко вкоренети. Жените и девојките редовно се соочуваат со бариери како што се ограничен пристап до спортска инфраструктура, недостаток на позитивни примери и нееднаква распределба на материјалните и нематеријалните ресурси. Дополнително, женските спортски активности често се помалку медиумски застапени, што води до минимизирање на нивните постигнувања и обесхрабрување тие да се вклучат и/или продолжат со спортската кариера.

На овие три работилници учесниците ги истражија основните прашања за човековите права на спортистите и актуелната состојба во спортот. Преку интерактивни сесии, тие се запознаа со родовите улоги, стереотипите и дискриминаторските практики, а работеа и на креирање акциски планови за унапредување на родовата еднаквост во своето непосредно опкружување. Како резултат од ова, сите учесници успешно мапираа и предложија повеќе мерки за подобрување на состојбата, како што се: воведување квоти за родова застапеност во телата за управување на спортските федерации, кампањи за поттикнување на интересот кај девојчињата и жените за активно учество во спортот, обезбедување еднаков пристап и услови до спортските ресурси и лиги за сите. Како дел од препораките, беше истакната потребата за примена на родово-трансформативениот пристап. Ова подразбира создавање услови во кои правата и можностите не зависат од полот и родот, а спортот се користи како средство за промоција на општествената еднаквост меѓу мажите и жените.

Учесниците ги споделија своите размислувања за тоа како ќе го применат стекнатото знаење. Еве некои од нив: „Кога ќе правам презентација, односно упис на нови членови ќе информирам дека секое запишано девојче во клубот ќе ја добие прва членарина бесплатно, а ќе добие и клупска маица“; „Како член на Управниот одбор и потпреседател на училишниот спорт ќе давам предлози за носење одлуки за еднаков пристап и можности до сите ресурси и натпревари за девојчињата и момчињата“; „Ќе работам на поголемо насочување на спортистките во жени тренери и лично ќе бидам пример за опкружувањето околу мене и мојата организација, барем да не паѓаме под нивото на родова сензитивност“.

Родовата еднаквост во спортот е основно човеково право и обврска за сите нас и затоа заедничкиот ангажман на институциите, спортските организации и целото општеството е клучен за надминување на долгогодишните предрасуди и дискриминација со која се соочуваат спортистките. Наша цел е спортот да стане симбол на еднаквост и инклузивност, градејќи основа за поправедно општество.
Проектот „Фер игра: поддршка за родова еднаквост во спортските политики“ го спроведуваат Олимпискиот комитет на С. Македонија со партнерите: Македонскиот центар за меѓународна соработка (МЦМС), Спорт Соушл Солушнс и Македонски параолимписки комитет. Проектот е финансиски поддржан од Европската Унија.

Следно >

Поврзани: