Digital Spark избра 100 грантисти за зајакнување на дигиталната демократија во Источна Европа и Централна Азија

Грантовата шема Digital Spark избра 100 граѓански организации, грасрут иницијативи, неформални групи и активисти од Источна Европа и Централна Азија кои ќе добијат финансиска и нефинансиска поддршка насочена кон зајакнување на дигиталната демократија, граѓанското учество и демократската отпорност.

Кохортата опфаќа добитници и на Институционални грантови за стабилност и на Мали стратешки грантови за раст. Додека Институционалните грантови за стабилност поддржуваат организации кои служат како локални центри за зајакнување на капацитети и се во улога на градители на екосистемот, Малите стратешки грантови за раст им овозможуваат на помалите организации, грасрут иницијативите и новите граѓански актери да развиваат иновативни решенија прилагодени на нивните заедници.

Покрај финансиска поддршка, сите избрани грантисти ќе учествуваат во  сеопфатна програма за зајакнување на капацитетите која вклучува менторство, прилагодени програми за учење, можности за вмрежување, размена меѓу врсници, развој на дигитални вештини, поддршка за застапување и пристап до регионални платформи за соработка.

Грантовата шема Digital Spark привлече повеќе од 400 апликации од целиот регион за 100 достапни грантови, што ја покажува силната побарувачка за флексибилни механизми на поддршка и ја истакнува клучната улога на граѓанските актери во понатамошната одбрана на демократските вредности и поттикнувањето на граѓанскиот ангажман во дигиталната ера.

Во текот на периодот на спроведување, 100-те грантисти ќе развиваат и имплементираат проекти кои користат дигитални технологии за унапредување на учеството, зајакнување на граѓанскиот ангажман, подобрување на пристапот до информации, спротивставување на дезинформациите и создавање поинклузивни демократски простори.

Digital Spark е дел од проектот „Регионален механизам за поддршка (EECA)“, кој има за цел да ја зајакне отпорноста на граѓанското општество, да поттикне прекугранична соработка и да поддржи локални одговори на демократските предизвици во дигиталната ера.

Проектот „Регионален механизам за поддршка (EECA)“ го спроведуваат Фондација Метаморфозис и ТехСуп, во партнерство со ЦИВИКУС и во рамки на Иницијативата за дигитална демократија (ДДИ), која ги опфаќа земјите од Глобалниот Југ.