Подигнување на свеста за дигиталната безбедност кај младите: Метаморфозис одржа обуки за учениците од American High School Skopje

Во насока на подигнување на свеста за дигиталната безбедност кај младите, Фондацијата Метаморфозис одржа серија интерактивни обуки за учениците од прва до четврта година во средното училиште American High School Skopje. Обуките беа реализирани во две одделни сесии, во рамки на класниот час.

Првата обука беше посветена на основните концепти на дигиталната безбедност и предизвиците со кои се соочуваат младите во онлајн просторот. Преку практични примери и дискусија, учениците имаа можност да разберат колку навистина се безбедни онлајн и каква е поврзаноста меѓу физичката и дигиталната безбедност.

Посебен фокус беше ставен на поимот „дигитален отпечаток“ – уникатниот траг што секој корисник го остава при користење на интернет и дигитални услуги. Учениците се запознаа со начините на негово собирање, како и со позитивните и негативните аспекти од неговата употреба.

Во рамки на обуката беа обработени и теми како креирање силни лозинки, нивно безбедно чување и користење на менаџери за лозинки, проследено со практична демонстрација. Дополнително, беа претставени придобивките од двостепената автентикација (2FA), различните методи на нејзина примена и нивното ниво на заштита.

Втората обука беше насочена кон една од најчестите закани во дигиталниот свет – социјалниот инженеринг. Преку интерактивен пристап, учениците научија дека напаѓачите најчесто не ги таргетираат системите, туку луѓето, користејќи манипулација, доверба и емоции за да дојдат до чувствителни информации.

Беа презентирани различни техники на социјален инженеринг, со посебен осврт на фишинг нападите – како да се препознаат, кои се најчестите знаци на измама и како соодветно да се реагира. Учениците добија конкретни насоки за превенција, како и препораки за подобрување на безбедносните поставки на социјалните мрежи и е-пошта.

Овие обуки претставуваат важен чекор кон зајакнување на дигиталната писменост кај младите и нивна подготовка за побезбедно и поодговорно користење на интернетот.

Оваа вест изворно е објавена на веб-страната на Метаморфозис