Зелени знаења за силна локална заедница во Ропотово

Во периодот од мај до октомври годинава, во село Ропотово беа успешно реализирани шест едукативни работилници со локалното население, наменети за зајакнување на знаењата и практиките поврзани со одржлив развој, заштита на животната средина и енергетска ефикасност. Преку овие активности беа опфатени околу 70 локални жители од различни возрасни групи, што потврдува силен интерес и потреба за ваков тип на локални едукативни иницијативи.

Работилниците беа организирани во три тематски целини, со по две работилници за секоја тема:

Првиот циклус беше посветен на селекција на органски отпад и компостирање. Учесниците се запознаа со тоа што претставува органски отпад, кои се придобивките од неговата правилна селекција и како преку компостирање може да се создаде корисен ресурс за градините и земјоделските површини. Посебен акцент беше ставен на надоврзување на традиционалните рурални практики со современи, колективни системи за управување со отпад. Во рамки на овие активности беа поставени и станици за собирање органски отпад на две локации во селото, а на учесниците им беа поделени и мали кантички за собирање органски остатоци во домаќинствата.

Вториот циклус работилници беше насочен кон енергетска ефикасност во домаќинствата. Локалните жители добија практични совети и насоки за намалување на потрошувачката на енергија, поефикасно користење на електричните уреди и подобрување на условите во домовите, со што директно се придонесува и за заштеда на ресурси и за почиста животна средина.

Третата тематска целина ги опфати обновливите извори на енергија, со фокус на можностите за користење на сончевата и ветерната енергија во рурални средини. Учесниците се информираа за придобивките од зелените енергетски решенија и нивната улога во долгорочен, одржлив локален развој.

Сите работилници беа реализирани во рамки на активностите на Зелениот ресурсен хаб воспоставен во село Ропотово, кој има за цел да служи како централен простор за едукација, информирање и размена на знаења за одржливо земјоделство, енергетски ефикасни практики и употреба на обновлива енергија. Преку ваквите активности, Ропотово се позиционира како пример за активно вклучена и информирана локална заедница што чекори кон поодржлива иднина.

*Активностите се дел од проектот Паметно зелено село за одржлива иднина кој се спроведува со поддршка од Фондации Отворено Општество Западен Балкан.