Интерна обука за зајакнување на капацитетите на тимот за обезбедување психосоцијална поддршка за жени и деца жртви на насилство

Во рамки на нашите континуирани напори за обезбедување квалитетна и стандардизирана психосоцијална поддршка за жени и деца жртви на насилство, во периодот 13-15 август 2025, во просториите на Здружение СТАНИЦА ПЕТ се одржа Интерна тридневна обука за нашиот тим.

Обуката беше насочена кон унапредување на знаењата и вештините на професионалците кои секојдневно работат со жртви на родово-базирано и семејно насилство. Преку интерактивен и практичен пристап, беа обработени четири клучни теми:

• Психосоцијална поддршка на жртви од родово-базирано и семејно насилство. Темата се фокусираше на принципите и методите на обезбедување психосоцијална помош за жени и деца кои поминале низ трауматични искуства. Се дискутираше за пристапите кои овозможуваат изградба на доверба, препознавање на потребите на жртвите и креирање план за долгорочна поддршка.

• Работа со деца – жртви на семејно насилство. Посебен акцент беше ставен на специфичностите и чувствителноста во работата со деца. Учесниците разгледаа техники за комуникација со најмладите, начини на создавање безбедна средина и алатки за препознавање на траума кај децата. Ваквиот пристап овозможува градење доверба и поддршка на нивниот психо-емоционален развој.

• Интерсекциски пристап во поддршката на жртви. Обуката нагласи дека жртвите на насилство често се соочуваат со повеќекратни форми на дискриминација – на пример, поради етничка припадност, возраст, социјален статус или попреченост. Интерсекцискиот пристап им помага на професионалците да ги разберат сложените реалности на жртвите и да обезбедат услуга која е инклузивна и прилагодена на индивидуалните потреби.

• Себегрижа на професионалците кои работат со жртви. Работата со жени и деца жртви на насилство е емотивно и психички исцрпувачка. Затоа, темата за себегрижата беше посебно значајна – учесниците имаа можност да научат техники за справување со стрес, граници во професионалниот ангажман и стратегии за одржување на личната добросостојба. Само професионалци кои се грижат за себе можат да бидат поддршка за другите.

Обуката беше одржана од страна на Елена Чикос, искусен психотерапевт со долгогодишна пракса и експертиза во работа со жени и деца жртви на насилство. Со своето знаење и методолошки пристап, таа овозможи нашите професионалци да стекнат нови алатки и техники за подобра поддршка на корисниците.

*Оваа активност е дел од проектот „Пат до безбедност: Јакнење на услуги за психосоцијална поддршка за жени и деца“, кој го спроведува Здружение СТАНИЦА ПЕТ, во рамките на проектот „Институционализирање на квалитетни услуги за рехабилитација и интеграција на жртви од насилство II“, финансиран од Австриската агенција за развој (АДА) со средства на Австриската развојна соработка, а имплементиран од Националната мрежа против насилство врз жените и семејно насилство.