Жени со глас за праведен буџет во Штип: од проблем до иницијатива
Во рамки на проектот „Жени со глас за праведен буџет во Штип“, Гласен Текстилец реализираше четири едукативни работилници на тема „Родово одговорно буџетирање: од проблем до иницијатива“, наменети за жени од урбаните и руралните средини.
Работилниците беа реализирани со обучувачката Бети Пејева, преку интерактивен пристап, дискусии, практични вежби, групна работа и размена на искуства.
Од разбирање на буџетот до креирање иницијативи
Во текот на обуките, учесничките имаа можност подетално да се запознаат со процесот на креирање на општинскиот буџет и да разберат зошто е важно локалните буџети да ги земаат предвид различните потреби на жените и мажите.
Посебен акцент беше ставен на родово одговорното буџетирање: пристап кој овозможува јавните ресурси да се распределуваат поправедно и да одговараат на реалните потреби на заедницата.
Преку практична работа, учесничките идентификуваа конкретни проблеми и приоритети во своите локални средини. Работејќи во групи, тие ги анализираа проблемите и ги претвораа во родово буџетски иницијативи и конкретни предлози кои можат да бидат упатени до општината.
Од идеја до конкретен предлог
Работилниците отворија простор за разговор за прашања поврзани со пристапот до локалните ресурси, потребите на жените во урбаните и руралните средини и можностите за поголемо учество на жените во процесите на донесување одлуки.
Со секоја следна работилница, учесничките ги надградуваа своите знаења и ги доработуваа идеите, со цел тие да се претворат во реални и применливи иницијативи за подобрување на условите во локалната заедница.
Последната, четврта работилница беше посветена на финализирање на идеите и иницијативите. Следниот чекор е тимска работа на нивно доразвивање и официјално поднесување до Општина Штип, со цел конкретните предлози да бидат земени предвид во локалните политики и буџетски процеси.
Жените како активни чинителки во локалното одлучување
Преку овие активности, проектот придонесува кон зајакнување на знаењата и капацитетите на жените за активно учество во локалните процеси на одлучување. Истовремено, се создава простор нивните реални потреби и предлози да бидат препознаени како важен дел од планирањето и распределбата на јавните ресурси.
„Жени со глас за праведен буџет во Штип“ е проект спроведуван од Гласен Текстилец, во рамки на проектот „Equitable Governance: Enhancing Gender Responsive Budgeting in North Macedonia“, имплементиран од Хелсиншки комитет за човекови права и финансиран од UN Women.
Оваа вест изворно е објавена на веб-страната на Здружение за заштита на работничките права „Гласен Текстилец“
![[Aggregator] Downloaded image for imported item #51760](https://civicamobilitas.mk/wp-content/uploads/2026/10/viber_image_2026-10-01_17-18-23-732-e1791386995528_mcms-768x512.jpg)
![[Aggregator] Downloaded image for imported item #51688](https://civicamobilitas.mk/wp-content/uploads/2026/10/840133774_17959130763235552_502814887244435070_n-768x512.jpg)
![[Aggregator] Downloaded image for imported item #51690](https://civicamobilitas.mk/wp-content/uploads/2026/10/835640454_10243132301386325_6319941414456541047_n-768x358.jpg)
