ЗАДРЖУВАЊЕТО НА ОДРЕДБИТЕ ЗА КОНТАМИНИРАНИТЕ ПОДРАЧЈА Е ВАЖЕН ЧЕКОР, НО ПРОБЛЕМИТЕ СО ТРАНСПАРЕНТНОСТА И УЧЕСТВОТО НА ЈАВНОСТА ОСТАНУВААТ

Македонското здружение на млади правници го поздравува прифаќањето на амандманот со кој се задржуваат одредбите за контаминираните подрачја во Законот за животната средина. Со ова се спречува бришењето на постојната правна рамка за справување со последиците од долгогодишното загадување и за утврдување на одговорностите на надлежните институции.

Задржувањето на овие одредби само по себе не ги решава проблемите со Југохром, Лојане, Злетово и другите контаминирани подрачја. За тоа се потребни конкретни мерки, средства и доследно постапување на институциите. Сепак, вчера беше спречено уназадување на законската заштита на животната средина и здравјето на граѓаните.

МЗМП во изминатиот период достави коментари до надлежната собраниска комисија и информации до координаторите на пратеничките групи, предупредувајќи на последиците од предложеното бришење. Задоволни сме што нашите укажувања придонесоа овие одредби да останат дел од Законот.

Вчерашната комисиска расправа покажа дека остануваат сериозни проблеми со информирањето, учеството и правната заштита на јавноста.

Постапките за одобрување на елаборатите за заштита на животната средина и понатаму остануваат затворени за јавноста. На локалното население не му се обезбедува навремено информирање за проектите за кои се изработуваат елаборати, можност да доставува коментари и забелешки, ниту можност да ги оспорува одлуките за нивно одобрување. Учеството на јавноста треба да се препознае како помош во навременото откривање на ризиците и во спроведувањето на законодавството, а не како административен товар.

МЗМП ја потенцира важноста во Собранието да се изнесуваат правилни толкувања и граѓаните да имаат пристап до точни правни информации. Објавувањето известување за намера за спроведување проект за кој е потребна оцена на влијанието врз животната средина не го решава прашањето на учество на јавноста во постапките за елаборатите. Станува збор за различни постапки и нивното поистоветување создава погрешна слика за правата што им се достапни на граѓаните.

Дополнително, задржувањето на осумдневниот рок за жалба во првата фаза од постапката за оцена на влијанието врз животната средина, наместо предложените 15 дена, претставува пропуштена можност за унапредување на правната заштита на јавноста.

МЗМП ги повикува Собранието и Министерството за животна средина и просторно планирање да ги креираат законите во вистински транспарентна постапка, да обезбедат јавна расправа и законски решенија што ќе гарантираат навремено информирање, учество на јавноста и ефективна правна заштита.

Дополнително, Бараме Министерството да започне постапка за унапредување на правната регулатива за елаборатите за заштита на животната средина која не го опфаќа само Законот за животната средина туку и повеќето уредби кои се меѓусебно контрадикторни Очекуваме унапредување на партиципативноста во донесувањето на законите, Министерството да одговори на коментарите поднесени од МЗМП во јуни 2026 година за Нацрт Законот за природа и да овозможи јавна дискусија пред истиот да биде поднесен во Собранието.

Вчера беше зачуван важен дел од правната рамка. Следниот чекор мора да биде нејзино спроведување и унапредување, за правото на здрава животна средина да има вистинско значење во животот на граѓаните.

*Фотографиите се преземени од Мета.мк и Трн.мк

The post ЗАДРЖУВАЊЕТО НА ОДРЕДБИТЕ ЗА КОНТАМИНИРАНИТЕ ПОДРАЧЈА Е ВАЖЕН ЧЕКОР, НО ПРОБЛЕМИТЕ СО ТРАНСПАРЕНТНОСТА И УЧЕСТВОТО НА ЈАВНОСТА ОСТАНУВААТ appeared first on Myla.