„В џеб, ако нема каде друго!“ – акција за чистење на Градскиот парк во Скопје

Ова беше првата од планираните седум акции за чистење на разни делови на Скопје и околината, во наредните седум месеци.Група млади активисти и волонтери, од различна етничка припадност, вчера го исчистија Градскиот парк во Скопје од отпадоци фрлени надвор од местата предвидени за тоа. Акцијата е во рамките на проектот „В џеб, ако нема каде друго!“, во организација на Движењето за едукација и унапредување на дијалогот ЛЕАД.

– Задоволни сме од тоа како течеше акцијата. Покрај групата активисти организирана од наша страна, во акцијата се приклучија и други лица присутни во Градскиот парк. Особено нѐ прави среќни тоа што ни се приклучуваат и деца, затоа што кај нив е најбитна свеста за штитење на околината, како и развивањето на меѓуетничката толеранција, имајќи предвид дека меѓу активистите се говореа разни јазици – рече Вјоса Ајдини, претседателка на Движењето ЛЕАД.

Ова беше првата од планираните седум акции за чистење на разни делови на Скопје и околината, во наредните седум месеци.
Со оваа акција започна втората фаза на Преоктот „В џеб, ако нема каде друго!“. Првата се реализираше на Водно во текот на минатата година.

Покрај расчистувањето на локациите, акцијата има за цел и да ја крене јавната свест кај граѓаните за зачувување на животната средина. За таа цел, групата активисти носеа маици со слоганот „В џеб, ако нема каде друго!“. Акцијата овозможува младите од различни етнички заедници да работат заедно и да се дружат.

Проектот е поддржан од Програмата Цивика мобилитас, која ја спроведуваат НИРАС од Данска, Македонскиот центар за меѓународна соработка и Шведскиот институт за јавна администрација СИПУ.