Средината овозможувачка, предизвиците големи – објавен е новиот Извештај на МЦМС за 2023 година

Македонскиот центар за меѓународна соработка веќе 11 години го подготвува и објавува Извештајот за овозможувачка средина за развој на граѓанското општество. Последниот, објавен неодамна се однесува на состојбата во 2023 година. Со него се анализира овозможувачката средина за граѓанските организации со фокус на основните правни гаранции на слободите, се анализира рамката за финансиска одржливост и одржливост на ГО и односот Влада – граѓански организации.

Врз основа на наодите, со извештајот се констатира дека граѓанските организации во Северна Македонија продолжуваат да работат во овозможувачка средина, но има области каде што е потребно подобрување. Слободата на здружување е загарантирана за сите во законодавството и се применува во пракса без ограничувања.

За жал, во анализираната година нема напредок во сеопфатната реформа на рамката за државно финансирање на ГО. Државното финансирање продолжува да биде речиси непрепознатлив извор на приход за ГО и изнесува само 3% од вкупните приходи на организациите или во апсолутни бројки, околу пет милиони евра. Анализата покажува дека и тоа малку финансирање е достапно само за ограничен број организации. Сега и во иднина, недостигот од расположливи средства е сериозен предизвик за ГО.

Нема напредок ниту во однос на Законот за донации и спонзорства во јавните дејности, и покрај првичните планови за ажурирање на овој закон во соработка со ГО. Иако постои активна работна група во Министерството за правда, посветена на оваа работа, во текот на годината немаше значителен напредок.

Бојкотот од членовите на Советот продолжува да биде на сила и го потврдува неуспехот на властите да ги вратат стандардните распределби за државните средства во годишната програма за соработка со граѓанскиот сектор. Ова ги нагласува предизвиците во одржувањето на ефективна соработка помеѓу владата и граѓанското општество и ја нагласува потребата од подобрувања во механизмите за поддршка на ГО. Еден од клучите предизвици секако е тоа што институциите не ги гледаат граѓанските организации како на реален партнер и не ги вклучуваат доволно во процесите на носење одлуки.

Сите наоди можете да ги најдете во објавениот Извештај за матрицата за мониторинг на овозможувачката околина за развојот на граѓанското општество.

Подготовката на овој Извештај е дел од проектот „Западен Балкан за развој на граѓанското општество“ поддржан од Шведската агенција за меѓународна развојна соработка, Сида преку Регионалниот центар за развој на граѓанското општество.