Средби со граѓаните во Делчево и Берово: Локал Актив го засилува граѓанскиот ангажман во Источниот регион

На 8 октомври 2025 година, во рамки на проектот „Поттикнување на граѓанскиот ангажман во локалното владеење – Локал Актив“, поддржан од НЕД, а спроведуван од Институтот РЕСИС во партнерство со локалните граѓански организации, се одржаа две консултативни средби со граѓаните во Делчево и Берово.

Средбите се дел од пошироката серија на теренски активности што Институтот РЕСИС ги реализира во повеќе општини низ земјата, со цел да ги чуе гласовите на граѓаните, да ги идентификува локалните проблеми и да помогне истите да бидат формулираат како јасни општествени барања упатени кон институциите.

Преку ваквите средби, медиумот на заедницата Локал Актив, овозможува директен дијалог со жителите, локалните организации и независните новинари во регионот. На состаноците во Делчево и Берово граѓаните зборуваа за конкретни предизвици со кои се соочуваат нивните заедници, од проблеми со инфраструктурата, управувањето со отпад и јавните услуги, до потребата од поголема транспарентност и одговорност на локалните власти.

Собраните сознанија ќе бидат дополнително обработени и презентирани пред редакцијата на Локал Актив Исток, составена од локални новинари и граѓански активисти. Целта е овие теми да се преточат во истражувачки и аналитички приказни што ќе ја засилат видливоста на проблемите и ќе поттикнат институционални решенија.

Медиумот Локал Актив има за цел да го зајакне граѓанскиот ангажман и учеството во локалното владеење, да поттикне новинарско-граѓански сојузи за застапување на локални проблеми, како и да придонесе кон медиумски плурализам и развивање на комуникациските права на ранливите групи.

Овие две средби се дел од поширокиот циклус на консултации кои ќе продолжат да се спроведуваат во Источниот, Југоисточниот и Вардарскиот регион до март 2026 година.

Оваа вест изворно е објавена на веб-страната на РЕСИС институт