Промоција на публикацијата „Од дијаспора до различности“

Здружението на граѓани Есперанца – Светски културен центар, ги поканува сите заинтересирани на промоција на публикацијата на проектот „Од дијаспора до различности“ и разговор на тема „Значењето на поимот дијаспора во контекст на современата култура“. Настанот ќе се одржи на 22 јуни во 19:30 часот во Кино Култура.

Публикацијата е на англиски јазик и содржи преглед на активностите на проектот низ описи и документација на работилниците, изложбите, но и авторските текстови на повеќето теоретичари и практичари со нивните различни пристапи на оваа тема.

Дел од разговорот ќе бидат учесници и партнери на проектот, авторите на текстот и уредниците на публикацијата:
Дарка Радосављевиќ и Мирослав Кариќ (Remont – Белград)
Мирјана Пеитлер – Селаков (KunstOst – Грац)
Роберт Алаѓозовски, министер за култура;
Елизабета Шелева, професорка на одделот за компаративна книжевност, при Филолошкиот факултет „Блаже Конески“;
Јане Чаловски, независен уметник и ко-основач на Press To Exit;
Нада Прља, независна уметничка и ко-основачка на Агенцијата за сериозни интереси.

Проектот „Од дијаспора до различности“ се реализира од 2015 до 2017 година во Белград, Загреб, Грац, Скопје, Казабланка и Мастрихт низ различни формати како изложби, работилници, конференција, дискусии и презентации. Основната идеја е преиспитување на значењето на поимот дијаспора на подрачјето на Западен Балкан, првенствено во полето на современата култура, промената на амбиентот и начинот на живот во контекст на сè поголемата мобилност, глобализација и културен номадизам.

Есперанца – Светски културен центар во проектот учествуваше преку организирање на три работилници на Анастас Вангели, Владимир Пиштало и Ирина Карамарковиќ, организирање на голема конференција во Скопје каде беа презентирани различни пристапи кон терминот „дијаспора“ и организирање на изложба на која учествуваа шест уметници и тоа: Младен Бундало, дуетот диСТРУКТУРА, Ивана Ивковиќ, Нада Прља, Рајко Радовановиќ и Нели Ружиќ.

Есперанца – Светски културен центар е корисник на мал акциски грант од Цивика мобилитас. За повеќе информации, можете да го погледнете нивниот профил.