Превенцијата како инвестиција во иднината на младите

Употребата на психоактивни супстанции кај младите во Република Северна Македонија претставува сериозен и растечки јавноздравствен, образовен и социјален предизвик. Иако постојат стратегии и поединечни иницијативи, превенцијата сè уште не функционира како системска и институционализирана јавна политика. Активностите најчесто се проектно ориентирани, временски ограничени и нерамномерно достапни, без унифицирани стандарди и механизми за следење на ефектите.

ХОПС – Опции за здрав живот предлага воспоставување национален систем за превенција на употреба на дроги, вграден во редовното функционирање на образовниот систем и поврзан со здравствениот и социјалниот сектор. Предложениот модел се темели на пристап заснован на докази, на концептот „училиште како заштитен фактор“ и на јасна меѓуресорска координација.

Документот предвидува усвојување национални стандарди, развој на унифицирана програма, воспоставување координациско тело, систем за континуирана обука и супервизија, како и национален механизам за следење и евалуација. Особен акцент се става на улогата на локалната самоуправа и на структурираното вклучување на родителите како клучни партнери во превенцијата.

Предложената политика е усогласена со Агендата 2030 и со Европската детска гаранција (Child Guarantee), со што се зајакнува усогласеноста со европските стандарди во областа на јавното здравје и детските права. Инвестицијата во превенција не е трошок, туку долгорочна инвестиција во човечкиот капитал, образовната еднаквост и социјалната кохезија.

Преминот од проектна кон системска логика е неопходен за обезбедување континуитет, отчетност и одржливост на мерките. Непостапувањето носи ризик од продлабочување на нееднаквостите и од зголемени социјални и економски трошоци во иднина.

Ги повикуваме носителите на одлуки, институциите, стручната јавност и граѓанскиот сектор да се запознаат со целосниот документ и да се вклучат во процесот на воспоставување одржлив национален систем за превенција.

Преземете го целосниот документ и информирајте се за предложените системски решенија.

Проектот „Воспоставување на национален систем за превенција на употреба на дрога во средните училишта“ е ко-финансиран од Европската Унија преку Европскиот инструмент за демократија и човекови права (ЕИДХР).
Содржината на оваа објава е единствена одговорност на ХОПС – Опции за здрав живот и не ја одразува нужно гледната точка на Европската Унија.

The post Превенцијата како инвестиција во иднината на младите appeared first on ХОПС.

Оваа вест изворно е објавена на веб-страната на Здружение ХОПС – Опции за здрав живот Скопје