Концептот на мониторинг, евалуација и учење е нераскинлив елемент на успешното раководење со граѓанските организации

Граѓанскиот ресурсен центар (ГРЦ) продолжува да ги јакне граѓанските организации. Овој пат, фокусот беше ставен на концептот на мониторинг, евалуација и учење (МЕУ) на организациско ниво, кој меѓу другото,  придонесува кон зајакнување на отчетноста и транспарентноста на организациите,  овозможува постојано подобрување преку системот на учење и го подигнува кредибилитетот на организацијата како соработник, партнер и актер во граѓанското општество.

Работилницата на оваа тема се одржа на 16-17 декември 2025 во ГРЦ Скопје, како последователна активност на онлајн обуката за МЕУ, која беше услов за учество на работилницата.

Во текот на овие два дена учесниците се запознаа со клучните теоретски рамки и принципи на МЕУ во граѓанските организации; ги идентификуваа организациските предуслови за ефективно воспоставување на систем за МЕУ; се запознаа со начинот на развивање и унапредување на процеси, процедури и политики поврзани со мониторинг и евалуација; работеа на подготовка на План за МЕУ, вклучувајќи индикатори, почетни и целни вредности и се запознаа со начинот на кој се дефинираат методи за собирање, обработка и анализа на податоци. Исто така научија како се  планираат евалуации и практично работеа на изработка на работни задачи за спроведување на евалуациите. Во последната сесија учесниците научија како се користат податоците од МЕУ за организациско учење, подобрување на програмите и транспарентно известување.

„Секоја опција за унапредување на професионалните капацитети е потребна и добредојдена. Обуката за мониторинг, евалуација и учење е исклучително корисна и практична бидејќи овозможува подобро и појасно разбирање на процесите за систематско планирање, следење и унапредување на програмските активности, како и следење на резултатите како показател за потребните промени во областа. Обуката понуди конкретни и применливи алатки и информации за мерење на ефектите од проектите и како истите да се применат во секојдневната работа на луѓето кои се вклучени во граѓанскиот сектор“, рече Билјана Настеска-Каланоска од Здружението на новинари на Македонија.

Покрај теоретскиот дел, за време на работилницата беа споделени и конкретни алатки за спроведување на мониторингот, евалуацијата и учењето, меѓу кои: Листа за развивање индикатори за МЕУ, Листа за приоритетни области, Образец за целни и фактички вредности, Образец за МЕУ план на организациско ниво, Процесна мапа на МЕУ и др., кои од страна на учесниците беа оценети како исклучително корисни.

„Исклучително корисна и практично ориентирана обука за мониторинг, евалуација и учење. Особена вредност имаа презентираните практичните алатки и примери кои можат веднаш да се применат при изработка на стратешки планови и воспоставување системи за мониторинг во граѓански организации. Голема благодарност до Граѓански ресурсен центар и предавачката за несебично ангажирање и споделување на знаење, алатки и искуства од областа“ истакна Ирена Спасеноска од Институтот за лидерство и јавни политики од Тетово.

И Сашо Димитров, финансиски и административен консултант на Институтот за кризен менаџмент ИКМ од Скопје го изрази своето задоволство од оваа работилница: “Работилницата за МЕУ на организациско ниво за граѓанските организации придонесе за подобро разбирање на улогата на мониторингот, евалуацијата и учењето во зајакнување на организациските капацитети. Преку практични примери и интерактивни дискусии, стекнавме корисни знаења за примена на МЕУ во секојдневното работење и стратешкото планирање“ рече тој.

За учество на оваа работилница граѓанските организации се пријавуваа на јавно објавениот Повик за учество на работилница за Мониторинг, евалуација и учење на организациско ниво за граѓанските организации.

Работилницата беше организирана во рамки на проектот „ЕУ поддршка на Граѓанскиот ресурсен центар – фаза 2“, финансиран од Европската Унија, а спроведуван од Националната фондација за развој на граѓанско општество Граѓански ресурсен центар, Македонскиот центар за меѓународна соработка (МЦМС), Медиа плус, Штип и Асоцијација за демократски иницијативи – АДИ, Гостивар

Оваа вест изворно е објавена на веб-страната на Македонски центар за меѓународна соработка