Акција за чистење на Водно: „В ЏЕБ, ако нема каде друго!“

Група млади луѓе, организирани од Движењето за едукација и унапредување на дијалогот ЛЕАД, ќе спроведе акција за чистење на падините на Водно, под мотото „В ЏЕБ, ако нема каде друго!“

Акцијата е закажана за во недела (8.05.2016) со почеток од 12 часот. Збирно место е Средно Водно, пред жичарата, со која учесниците ќе бидат префрлени до врвот на планината. Групата волонтери ќе ги собира фрлените отпадоци пешачејќи надолу, до Средно Водно.

Ги повикуваме граѓаните на Скопје да ни се приклучат на акцијата. Неколку формални и неформални групи, како и поединци, веќе најавија дека ќе нѝ се приклучат.

Ова ќе биде првата од планираните шест акции за чистење на падините на Водно во наредните шест месеци.

Покрај расчистувањето на планината, акцијата има за цел и да ја крене јавната свест кај граѓаните за зачувување на животната средина. За таа цел, групата активисти ќе носи маици со слоганот „В ЏЕБ, ако нема каде друго!“, а во текот на втората акција ќе бидат закачени и 100 дрвени таблички со овој слоган.

Проектот „В ЏЕБ, ако нема каде друго!“ е поддржан од програмата Цивика Мобилитас.

Цивика Мобилитас е проект на Швајцарската агенција за развој и соработка (СДЦ), кој го спроведуваат НИРАС од Данска, Македонскиот центар за меѓународна соработка и Шведскиот институт за јавна администрација. Проектот е поддржан и од Секторот за животна средина на Град Скопје.