За што зборуваа кандидатите во изборната кампања: Месечен преглед на медиумските објави #2

Месечен преглед на медиумските објави [20-30 октомври 2025]

За што зборуваа кандидатите во изборната кампања:

Периодот по првиот изборен круг, помеѓу 20 и 30 октомври, донесе висока медиумска активност и интензивен онлајн ангажман. Иако првичниот еуфоричен тон по изборните резултати постепено се намали, јавниот простор остана динамичен, исполнет со анализи, реакции и нови ветувања во пресрет на вториот круг. Над шест илјади медиумски објави и повеќе од седумстотини содржини на социјалните мрежи создадоа дигитален шум во кој вниманието се пренасочи од самите изборни исходи кон прашањата за идните коалиции, локалните приоритети и ветувањата за континуитет и реформи.

Овој период ја означи транзицијата од изборна реторика кон приказни насочени кон управување и одговорност — тон што ги одразува очекувањата на јавноста по завршувањето на гласачката трка.

Доминантни теми: образование, инфраструктура, отпад …

Во медиумскиот простор, најголема интеракција предизвикуваа содржини со емоционален и поларизирачки тон — теми поврзани со национален идентитет, интеграција во ЕУ, локално управување и транспарентност. Дигитално ориентираните портали продолжија да доминираат со својата способност да создаваат силни реакции на социјалните мрежи, додека традиционалните телевизиски и печатени медиуми го задржаа своето влијание преку континуитет и доверливост.

Оваа двојност создаде хибридна медиумска сцена: едната страна водена од брзина и емоција, а другата од стабилност и институционален авторитет.

Како што изборниот интерес се намалуваше, дискусијата се префрли кон прашања од јавен интерес. Темите за образованието и училиштата го предводеа дневниот ред со повеќе од 3.000 медиумски објави и вкупно над 100.000 интеракции. Следеа локалните проблеми — инфраструктурата, отпадот и јавните услуги — кои постигнаа највисока ефикасност во ангажман по објава. Дебатите околу интеграцијата во ЕУ, локалната самоуправа и дигиталните иновации добија дополнителен замав, одразувајќи ги очекувањата на граѓаните за реформи и модернизација.

На социјалните мрежи, покрај изборите, се истакнаа дискусии за детското здравје, дигитализацијата и иновациите. Овие теми, иако со помал број објави, генерираа висок одѕив и покажаа дека граѓаните сè повеќе бараат разговор за квалитетот на животот и модернизацијата, а не само за политичките резултати.

Каде се одвива дискусијата?

Ангажманот продолжи силно да варира во зависност од платформата. ТикТок (TikTok) остана најмоќниот канал за мобилизација на публиката, со просек од 600 интеракции по објава и докажа дека е клучен за пристап до помладите гласачи. Фејсбук (Facebook) ја задржа својата улога како централна арена за дискусија, додека Истаграм (Instagram) продолжи да се користи примарно за визуелно раскажување приказни и креирање на заедница. Неделата исто така виде постепена нормализација на тонот, бидејќи содржината на кампањата стана повеќе ориентирана кон прашања и помалку конфронтирачка.

Говорот на омраза

Иако интензивниот онлајн ангажман продолжи и по првиот круг, нивото на негативни коментари и говор на омраза не се зголеми значително. Во просек, меѓу 6 и 12 проценти од коментарите имаа негативен или навредлив тон — бројка слична на претходните недели. Најголем дел од говорот на омраза беше поврзан со идентитетски и етнички теми, а не со програмски разлики.

Ова покажува дека, и покрај поларизацијата, јавниот дискурс остана релативно контролиран, а доминантниот тон на комуникацијата се движеше кон прашања за одговорност, локално управување и перформанс на институциите.

Методологија

Податоците во овој преглед потекнуваат од сеопфатен мониторинг на јавниот дискурс реализиран преку платформата Pikasa Analytics, која комбинира автоматизирано следење со напредна анализа на содржините од онлајн медиуми и социјални мрежи.

Цивика мобилитас е проект на Владата на Швајцарија што го спроведуваат МЦМС, НИРАС од Данска и ФЦГ од Шведска. Мислењата и ставовите изразени во оваа објава не ги одразуваат ставовите на Владата на Швајцарија.