Огромен интерес за грантовите на Цивика мобилитас
Повеќе од 160 заинтересирани претставници на граѓанските организации беа дел од трите информативни сесии посветени на Повикот за партнерски грантови на Цивика мобилитас што се одржаа во Штип, Гостивар и Скопје. Тие има можност да ги слушнат главните насоки за подготовка на концептите на овој повик, темите и начинот на аплицирање, да постават прашања и да ги искористат настаните за вмрежување со колегите од другите организации.
Се што планираат да спроведуваат организациите треба да биде во согласност со целите и резултатите на Цивика мобилитас и во согласност со темите кои се објавија со овој повик: антикорупција, децентрализација, заштита на животната средина, родова еднаквост/социјална инклузија, образование, здравство и млади.
Голем дел од прашањата се однесуваа на подобноста на потенцијалните апликанти, носителите и партнерите; демонстрацијата на претходно искуство во менаџирање на проекти, финансиски капацитети итн. Во врска со финансиите, интересот беше насочен кон најнискиот и највисокиот износ што може да се побара, распределбата на буџетот помеѓу партнерите, алоцирањето средства за независна ревизија и сл. Исто така тие се интересираа за опфатот на акциите во географска и во тематска смисла односно, дали акциите можат да се прелеваат нив повеќе теми.
Новина во овој повик е целосното онлајн пријавување за кое е направена посебна платформа www.grants.mk (Преземи Водич за креирање профил). Организациите пред да ги поднесат концептите ќе се регистрираат на оваа платформа и ќе си отворат свој профил.
Предложените активности треба да бидат во времетраење од 30 до 36 месеци. Максималниот износ на грантот е 14.500.000 денари, додека пак вкупниот расположлив износ за повикот е 1.800.000 швајцарски франци.
Прашањата и одговорите од информативната сесија одржана во Скопје на 31 јули 2023 година, како и оние кои ќе пристигнат на helpdesk@civicamobilitas.mk заклучно со 31 јули 2023 година ќе бидат објавени во следните денови. Прашањата и одговорите од информативните сесии одржани во Штип (20 јули) и Гостивар (25 јули) како и оние пристигнати преку електронска пошта до 28 јули 2023 година (во 14 часот) се веќе објавени и може да ги видите на https://civicamobilitas.mk/cm-pg/.
Прашањата поврзани со онлајн аплицирањето кои се од технички аспект може да бидат доставени на support@grants.mk со наведување на ЕМБС на организацијата и краток опис на проблемот.
Рокот за поднесување пријави е 30 август 2023 г., најдоцна до 13:00 часот.
Цивика мобилитас е програмата за поддршка на граѓанското општество на Швајцарската амбасада која ја спроведуваат Македонскиот центар за меѓународна соработка (МЦМС), НИРАС од Данска, и ФЦГ од Шведска.
