Граѓанското учество е право и одговорност на сите

Во фокусот на овој број на Граѓаните за промена е граѓанското учество. Тема која граѓанските организации и во овој квартал не само што ја дискутираа туку и ја практикуваа.

Колегите од ПроЛокал, од Битола, тоа го правеа на регионално и на локално ниво, во цела Пелагонија. Заедно со партнерите од секторот и општините од регионот, тие ги вклучија младите чии предлози и анализи придонесоа за креирањето на пофер локални политики за сите девет општини. „Овие решенија не се напишани зад затворени врати, туку се резултат на процес во кој младите самите ги лоцираа проблемите“ вели Емилиа Ѓероска од „Про Локал“.  

Активистки од локалните заедници и претставнички на женски организации, организирани од  „Акција Здруженска“ – Скопје, дојдоа во Собранието за официјално да ги презентираат своите барања пред народните избранички. Тие побараа промени во Законот за локална самоуправа со кои ќе овозможат повеќефазна постапка за учество на граѓаните, со посебен фокус на гарантирано учество на жените.

Центарот за климатски промени го објави Извештајот во сенка за Поглавјето 27 кој открива дека состојбата со животната средина ни е ôд во место. Тие апелираа до Владата, Собранието и надлежните институции за итно усвојување на заглавените закони од Поглавје 27 и обезбедување стабилно финансирање за секторот животна средина и порачаа дека последиците од институционалната пасивност директно ги чувствуваат граѓаните преку влошување на здравјето и деградација на природните ресурси.

Како поддршка на сите иницијативи на граѓанските организации, особено кога е во прашање граѓанското учество, Цивика мобилитас го организираше вториот Национален форум – Саем на граѓански организации во соработка со Владата на РСМ. Изјавите на претставниците на централната власт беа и повеќе од охрабрувачки за соработката и учеството на граѓанските организации. Премиерот Мицкоски ја пренесе визијата на Владата за граѓанскиот сектор како силен, независен, професионален и одржлив кој е вистински партнер во креирањето и реализацијата на државните политики. „Сектор кој ја засилува демократијата, ги штити правата на граѓаните, ја следи работата на институциите и помага да се затвори јазот меѓу институциите и народот“, рече тој.

Она што ни останува на сите е многу работа со која ќе ги убедиме скептиците дека граѓанското учество не е само уште една од „популарните“ теми на граѓанските организации туку е наша одговорност како граѓански организации и како граѓани. Да бидеме свесни дека нашето учество во заедницата, на работа, во институциите, може да направи промена само ако го има. Процесите во кои учествуваат поголем број граѓани создаваат пореални политики затоа што вклучуваат различни перспективи. Нашата активност го прави општеството поправедно, посилно и поодржливо.

Погледнете што носи новиот број Граѓаните за промена #23.