Одговор на потребите на граѓаните погодени од КОВИД-19: 15 акции против КОВИД-19
Понекогаш, најважното е да се реагира кога помошта е најпотребна, особено кога нема други опции или кога брзината на одговорот е критична. Ад хок грантовите на Цивика мобилитас беа токму тоа – средство за брзо и ефективно помагање на 15 граѓански организации кои ги адресираа непосредните потреби на нивните крајни корисници, граѓаните на нашата земја. Иако овие грантови не беа особено големи по буџетот, нивната важност беше во покажувањето дека и во најтешките моменти, некој се грижи и дека кризата предизвикана од Ковид-19 може да се преброди заедно, чекор по чекор.
Оваа кратка брошура го истакнува напредокот на корисниците на овие грантови. Најважниот аспект на овие постигнувања се луѓето: жени и деца жртви на насилство, работници, ученици со проблеми во пристапот до образование, млади луѓе, воспитувачи, сиромашни и маргинализирани лица и многу други. Сите тие беа особено погодени од кризата предизвикана од пандемијата.
Граѓанските организации брзо реагираа, користејќи ги своите теренски контакти за да ги идентификуваат потребите на граѓаните и да ги прилагодат активностите според тие потреби. Оваа брошура е нашето признание за нивната брза и ефективна реакција, за обновувањето на вербата кај граѓаните дека заедно можеме да се избориме со оваа криза. Ова е признание за нивните достигнувања и посветеност.
