Од проблем до решение – млади во Гевгелија учеа како функционираат медиумите на заедницата

Работничкиот универзитет во Гевгелија вчера се претвори во импровизирана новинарска редакција каде над дваесет средношколци и студенти по новинарство учеа и тренираа како проблемите кои ги засегаат може да се преточат во сторија или тема за активизам преку кои ќе се подобрат нивните заедници.

На работилницата, организирана од СЕММ и Институтот РЕСИС преку проектот „Медиуми на заедницата за посилно граѓанско општество”, учествуваа гимназијалци од Гевгелија и Богданци, активни во училишни новинарски клубови, и студенти по медиумски студии од Универзитетот „Гоце Делчев” од Штип. Заедно учеа за медиумите на заедницата и медиумската етика, а преку практични примери вежбаа и разработуваа теми од јавен интерес.

Во првиот дел Снежана Трпевска, претседателката на РЕСИС, им го прикажа светот на медиумите на заедницата. Преку примери од светски и регионални искуства, Трпевска покажа како овие медиуми се придобивка на локалната демократија и го засилуваат гласот на заедниците кои недоволно се застапени во традиционалните медиуми.

Преку примерот на Локал Актив, каде новинари, активисти и млади од Македонија работат на откривање и решавање локални проблеми, Трпевска објасни како во пракса може да функционира една ваква симбиоза. Низ презентација на неколку конкретни теми и застапувања од редакциите на Локал Актив, младите можеа да видат како овој процес изгледа во пракса – од првичната идеја, преку истражувањето и застапувањето до конечниот позитивен исход –  решение на проблемот.

„Да, новинарството го доживувам како хоби повеќе, бидејќи обожувам да пишувам, но и затоа што гледам дека имам некаков придонес во заедницата околу мене и тоа ме прави баш среќна. Ваквите обуки ни помагаат за да стекнеме различни ставови, ни помагаат уште да подобро да ги пишуваме сите наредни проекти во училиште“, вели Ванеса Костадинова, ученичка во Средното општинско училиште „Богданци“.

Билјана Георгиевска, извршната директорка на СЕММ, фокусот го стави на етичките и професионалните стандарди во новинарството. Таа ги запозна младите со клучните начела од Етичкиот кодекс на новинарите, потенцирајќи дека вистинитоста, професионалноста и објективноста не се формалности, туку темел без кој ниту еден медиум не може да ја заслужи довербата на своите сограѓани.

Георгиевска исто така објасни како функционира механизмот за поплаки до СЕММ – практична информација која им дава на младите активисти конкретна алатка за реагирање кога ќе се сретнат со манипулативна, неетичка или злонамерна содржина, без разлика дали таа доаѓа од традиционален или социјален медиум.

Вториот дел од работилницата им припадна целосно на учесниците средношколците и студентите ги споделија своите досегашни искуства и идеи за идни новинарски приказни, работеа во групи и предлагаа конкретни локални проблеми кои, според нив, заслужуваат новинарска обработка. Тие добија фидбек од предавачите и нивните идеи се обликуваа во концепти за истражувачки стории, придружени со јасно дефинирани чекори како тие би можеле да се изработат и како во иднина би можеле да се застапуваат нивните општествени барања.

„Мислам дека ваквите обуки ни помагаат, за да го развиеме нашиот начин на размислување. Во иднина, во нашиот училишен новинарски клуб би се фокусирала на локалните проблеми и би пробала да го најдам наједноставното решение“, ни изјави Глорија Гешевиќ, средношколка од СОУ „Богданци“.

Обуката во Гевгелија не заврши само со размена на знаење. Таа отвори врата и за понатамошна соработка – младите добија увид во работењето на Локал Актив со можност во иднина да се приклучат во редакциите, да пишуваат стории и активно да се вклучат во застапувачки процеси за решавање проблеми во нивните заедници.

*Содржината на оваа објава е единствена одговорност на Институтот РЕСИС и на Советот за етика во медиумите на Македонија (СЕММ) и на ниту еден начин не може да се смета дека ги одразува гледиштата на Владата на Швајцарија, „Цивика мобилитас“ или на организациите што ја спроведуваат.