Што ни кажуваат младите, и дали некој конечно ги слуша?

Во рамки на проектот NextGEN (NextGen Намалување на штети: Справување со предизвикот на новите психоактивни супстанции), кој се однесува на воспоставување на он-лајн сервиси кои треба да понудат едукација за безбедно однесување на младите со новите психоактивни супстанци, почнавме да ги прашуваме младите: Што знаете за новите дроги? Каде и како дознавате за нив? Кому му верувате?

Одговорите беа гласни.

• „Никој не ни кажува ништо без да не осудува.“
• „Во училиште молк. На интернет – паника.“
• „Сами гугламе. Понекогаш грешиме.“

Така се појави он-лајн заедницата Trip Tapes. Не како дел од уште еден проект, кој кога ќе заврши ќе ја снема и заедницата, туку како експеримент на доверба. Доверба, сфатена како двонасочна улица. Улица во која од едната страна се младите, а од другата страна се наоѓаме ние – граѓански активисти кои имаат експертиза и непоколеблива намера темата за употреба на нови и многу често небезбедни психоактивни супстанци да ја подигнеме од ниво на табу – на ниво на чесна комуникација од која полза ќе имаат сите, особено младите.

Затоа Trip Tapes не е само кампања, туку е и огледало:

• Реелс, анкети, GIF-ови, јазик кој не лаже.
• Експериментирање со доверба, а не со хемија.

 

 

Но приказната не застанува таму. Паралелно, ХОПС ја движи најсистемската иницијатива досега:

Национален систем за превенција на употреба на дроги во училиштата (NSPDU), поддржан од EIDHR кој има за цел да воспостави системска, долгорочна и институционализирана превенција на употреба на дроги во средните училишта во Северна Македонија. Создавањето на овој национален систем ќе значи и создавање на:

• Национални стандарди за превенција на употреба на дроги
• Унифициран прирачник за училишниот кадар
• Пилот програма во едно средно училиште (Тестирање на моделот во реални услови).
• Обука за најмалку 200 професионалци во образованието
• Модел за долгорочна институционална имплементација

Партнерството со Министерството за здравство и Министерството за образование и наука ќе овозможи создавање на јасна насока за вклучување на националните стандарди во наставните политики по завршување на проектот.

Ова не е само проект – туку обид да се создаде одржлив систем за поддршка, едукација и заштита на младите во образовниот систем.

 

И сега – за прв пат – овие два света почнуваат да се гледаат меѓу себе. Trip Tapes ни покажа како зборуваат младите. NSPDU се обидува да ги научи институциите како да слушаат.

Дали ова е крајот на ѕидот меѓу „НИВ“ и „НАС“? Не знаеме.

Но знаеме дека ако не го премостиме овој ѕид – ќе изгубиме генерации …

---

NextGen има за цел да ги подобри капацитетите за намалување на штетите кај професионалците и организациите во Европа, фокусирајќи се на иновативни одговори на новите психоактивни супстанции (НПС).
Партнери во проектот се ARAS (Романија), Re Generation (Србија), HOPS (С. Македонија) и GAT (Португалија). Финансирано од Европската Унија.

 

The post Што ни кажуваат младите, и дали некој конечно ги слуша? appeared first on ХОПС.

This post was originally published on this site