ЗЗ Агро Фаланга во посета на прилепското село Мало Рувци по повод традиционалното стрижење на овци
Здружението за земјоделци „Агро Фаланга“ го посети прилепското село Мало Рувци. На покана од сточарот од ова село, Зоран Трајчески, претседателот на здружението Љупче Станковски, сточарот Ѓоке Велков од кавадаречкото село Марино и уште неколкумина сточари од прилепско присуствуваа на стрижење на околу 350 овци. Искусниот Велков им се придружи на прилепските сточари во стрижењето, а домаќинот Трајчески ги организираше сточарите пришто им подели неколку нови машинки за стрижење на овци. Се стрижеше традиционално со ножици, а воедно се испробаа и новите машинки на домаќинот. Гостите вредно работеа, а на крајот беа угостени од добриот домаќин со неизбежното печено јагне.
Оваа средба беше можност за поблиско запознавање на сточарите меѓусебе, а воедно им овозможи и простор за размена на искуства во одгледувањето на овци, пришто се заложија за взаемна помош и поддршка.
Љупче Станковски на оваа средба посебно им посвети внимание на проблемите со кои се соочуваат сточарите. Тој ги ислуша до крај нивните излагања. Проблемите се многубројни и горливи, посебно проблемот со ниската откупна цена на јагнето и на млекото кои систематски ја уништуваат оваа сточарска гранка. Ова доведува до колапс на сточарството и до намалување на бројот на грлата во државата. Монополот создаден во откупот на јагнешкото и слабиот откуп и многу ниската цена за млекото како резултат на користење супститути во производството на млечни производи од страна на големите млекопреработувачки капацитети во државата, се главен причинител за замирањето на овчарството кај нас.
Станковски на сточарите им ја понуди сета помош и поддршка што здружението може да им ја пружи, притоа нудејќи и модуси за решавање на некои од проблемите. Тој исто така ги поттикна сточарите да се здружуваат во здруженија, бидејќи така здружени се посилни во борбата со проблемите. Иницијативата за формирање на здруженија не е нова, па затоа ЗЗ „Агро Фаланга“ во формирањето на истите им ја нуди својата техничка помош и човечки ресурси на располагање заради олеснување и забрзување на процесот на формирање.
Целодневната работна средба заврши со позитивни заклучоци и иницијативи кои веќе уште денес почнуваат да се реализираат. Процесите не се лесни, но кога силите се здружени, резултатите побрзо доаѓаат.
![[Aggregator] Downloaded image for imported item #51760](https://civicamobilitas.mk/wp-content/uploads/2026/10/viber_image_2026-10-01_17-18-23-732-e1791386995528_mcms-768x512.jpg)
![[Aggregator] Downloaded image for imported item #51688](https://civicamobilitas.mk/wp-content/uploads/2026/10/840133774_17959130763235552_502814887244435070_n-768x512.jpg)
![[Aggregator] Downloaded image for imported item #51690](https://civicamobilitas.mk/wp-content/uploads/2026/10/835640454_10243132301386325_6319941414456541047_n-768x358.jpg)
