Завршен настан „Паметно зелено село за одржлива иднина“

Денес во Ропотово официјално ги промовиравме резултатите од проектот Паметно зелено село за одржлива иднина, кој се реализираше со поддршка од Фондациите Отворено општество – Западен Балкан. На настанот беа презентирани клучните постигнувања на проектот, како и наодите од предфизибилити студијата за утврдување на потенцијалот на селото и околината за изградба на соларна фарма – важен чекор кон локално производство на чиста, обновлива енергија.

На настанот се обрати Весна Шапкоски, извршната директорка на здружението, која ги презентираше активностите на проектот и клучните постигнувања, вклучувајќи ја успешната имплементација на шесте едукативни работилници, воспоставувањето на Зелен Ресурсен Хаб, како и процесот на колективно компостирање со првиот произведен органски хумус кој беше споделен со жителите, институциите и бизнис заедницата.

По презентацијата на проектот, свое излагање имаше Андреј Стојкоски, дипломиран градежен инжинер и еден од авторите на предфизибилити студијата. Тој ги презентираше клучните наоди од студијата, потврдувајќи дека Ропотово има значајни природни и просторни предиспозиции за развој на модерен енергетски капацитет, кој ќе придонесе кон одржлива енергетска иднина на заедницата.

Настанот продолжи со дискусија и планирање на следните чекори за развој на зелени енергетски решенија, вклучувајќи можност за идни локални проекти за соларна енергија, како и дополнителни активности за поддршка на одржливото земјоделство и управување со отпадот.

Со заеднички ангажман и идни активности продолжуваме да ја градиме визијата за посилни, паметни и енергетски одржливи рурални заедници.

Активноста се реализираше во рамки на проектот „Паметно зелено село за одржлива иднина“, кој се спроведува со поддршка од Фондациите Отворено општество – Западен Балкан.

This post was originally published on this site