Урбан дијалог… денови на креативно работење во Маврово

Претставници на Гаус Институт, МНД-Битола, граѓанските организации „Новак 2014“-Новаци и Лидер Плус -Могила, од 14 до 16 декември во Маврово, врз принципот „работа во мирни услови“ (Work in Peace), што значи не под притисок на урбаниот метеж и нон-стоп ѕвонење на мобилните телефони, одржаа „Обука за обучувачи“.

Оваа активност која е во рамките на проектот Иницијативата за јакнење на партиципативната култура во урбанистичкото планирање во Република Македонија овозможи на едно место да се соберат и дружат експерти и претставници на граѓанскиот сектор од пелагонискиот регион, а со единствена цел да се „рефрешираат“ досегашните и обезбедат нови знаења кои пак ќе бидат пренесувани на јавноста во пелагониските општини.

Проектот координиран од м-р Александра Лозановска им овозможи на учесниците да се запознаат со информатички и комуникациски алатки за учество на граѓаните во урбанистичкото планирање, со посебен акцент на веб алатка за што говореше проф. д-р Игор Неделковски, додека за процесната вештина лобирање и нејзина примена во пракса со посебен акцент на урбаниот дијалог, говореше доц. д-р Марјан Танушевски.

Обуката за обучувачи од првиот момент се реализираше динамично, интерактивно и со голема соработка, од што произлезе заклучокот дека освен квалитет… тоа беа и инспиративни денови на креативно работење за сите учесници.

Продолжуваме со следната фаза од овој проект поддржан од ЦИВИКА Мобилитас.