Учество на обука за застапување против семејното насилство

Правилното информирање на јавноста за природата на семејното насилство и фактичката состојба на жените што претрепеле семејно насилство, како и законските механизми за заштита придонесува за зголемување на општетвената поддршка и охрабување на жените да го пријават насилството и побараат помош и поддршка.

Во периодот 2-3 октомври се одржа Обука за етичко, професионално и законско известување за семејното насилство во х. Глориус – Велес, на која новинари и претставници на граѓански здруженија, меѓу кои и претставници на нашето здружение се стекнаа со знаења и вештини, како и насоки за пишување на влијателни медиумски содржини за подобрување на разбирањето на општата јавност за семејното насилство.

Воведно обраќање на настанот имаше заменик амбасадорот на Франција Г-дин Philippe Marcheteau кој ги нагласи досегашните постигнувања на ова поле и значењето на ваков вид на иницијативи за зголемување на превенцијата на семејното насилство.

Обуката се спроведе во рамки на проектот: „Откријте, ангажирајте, поттикнете: застапување против семејното насилство“ , финансиски поддржан од Француска амбасада во Република Северна Македонија, а истиот се спроведува од страна на Здружение за еманципација, солидарност и еднаквост ЕСЕ од Скопје, во соработка со Здружение Мајка од Куманово, Станица ПЕТ од Прилеп и Женски форум од Тетово.

Главните цели на проектот се подобрување на разбирањето на новинарите за природата на семејното насилство, правната рамка за заштита на жените што претрпеле семејно насилство, како и начинот на известување на медиумите за случаи или прашања во врска со семејното насилство, поддршка на граѓанските организации (ГОи) во креирањето на приспособливи, точни и концизни информации на тема семејно насилство, со цел овие информации да бидат подостапни за медиумите и олеснување на вмрежувањето и подобрување на соработката помеѓу ГОи и новинарите за поефикасно справување со семејното насилство како општествен проблем.

Како резултат на спроведените активности локалните новинари и ГОи под менторство на искусен новинар во секоја од општините ќе работат на подготовка на два ко-авторски текста во врска со семејното насилство чија цел е да се придонесе за создавање на долгорочни партнерства помеѓу медиумите и ГОи во борбата против дезинформациите поврзани со семејното насилство. Медиумските приказни (текстови) ќе бидат подготвени земајќи ја предвид важноста на етичкото медиумско известување и почитување на стандардите при известувањето за случаи или теми во врска со семејното насилство.