Шест години ИНРЕКОМ

Историјата на Институтот за развој на електронски комуникации ИНРЕКОМ во Скопје почнува во летото на 2018 година. Група млади политолози и новинари, мотивирани со идејата за формирање на невладина организација, се стремеа кон создавање на значаен и препознатлив субјект во сферата на промоција и подобрување на развојот на електронските комуникации и медиумските услуги во Македонија.
Од тогаш, ИНРЕКОМ започна со активности, при што визијата за дигитализација на Македонија не само што не стагнираше, туку и постојано се засилуваше и унапредуваше преку нашите коментари, предлози, истражувања и анализа.

Во изминатите 6 години, ИНРЕКОМ зад себе низ бројки има:
✅ 10-на реализирани проекти
📚 10-на публикации, коментари, реакции и мислења за извештаи и предлог закони
📊 20-на спроведени истражувања на јавното мислење и истражувања на пазари за сопствени потреби и потреби на клиенти
🔍 10-на мониторирани регулаторни тела, државни институции и оператори
📝 10-на склучени меморандуми за соработка
📰 споделени објави во над 70-на медиуми

Откако бевме основани, ги следиме сите законски прописи поврзани со функционирањето на граѓанските организации. Непрекинато ги подобруваме нашите процедури за ефикасно функционирање преку развивање на стратегиски, акциски и комуникациски планови.
Па така, во 2022 година беше усвоен и повеќегодишниот стратешки план за развој, кој ги заменува општите области како „електронски комуникации“ и „медиуми“ со поспецифични дефиниции. Од 2023 година, Институтот се фокусира подетално кон:
– класични и модерни медиуми, слободата на говор, медиумската и информациската писменост
– развој на дигитализацијата и дигиталната писменост
– следење на операторите на електронски комуникации
– сајбер безбедност и хибридни закани со акцент на лажни вести
– мониторинг на процесот за следење на електронските комуникации и работата на агенцијата надлежна за следењето на комуникациите
– сајбер булингот и говорот на омраза
– дигиталната трансформација на јавната администрација и дигитализација на јавните услуги
– следење на процесите во електронското банкарство, крипто валутите и дигиталниот маркетинг

Во следниот период планираме враќање на информативниот портал НТВ.мк, продолжување на поткастот Инфотек, отворање на Академија за медиумска, информациска и дигитална писменост која ќе одржува обуки, работилници, каравани и летни кампови. Дополнително ИНРЕКОМ планира засилено да нуди правна и друг вид помош при поднесување на приговори до операторите и регулаторните тела од страна на корисниците.
Инстиутот ќе продолжи да работи на застапување на политики за независни регулаторни тела, развој на пазарот на електронски комуникации и за независни и професионални медиуми.

ИНРЕКОМ останува да биде отворен за млади талентирани индивидуи кои преку волонтерство се посветени на дополнувањето на успешната репутација на Институтот со свои идеи и учество во истражувањата. Продолжуваме и да го зголемуваме бројот на вклучени истражувачи во проектите кои ќе претстојат во наредниот период. Ја продолжуваме и ќе ја засилиме соработката со нашите партнери, пријатели и клиенти. Дополнително во претстојниот период, ИНРЕКОМ ќе подлежи и на мало освежување на визуелниот идентитет согласно новите трендови.
За крај, во претходните шест години, многу медиуми и новинари го следеа развојот на ИНРЕКОМ, чија поддршка беше клучна за тоа што Институтот стана денес, и за тоа сме им исклучително благодарни.